Demokratët reagojnë pas sulmeve në Iran
Zyrtarë të Partisë Demokratike në Shtetet e Bashkuara kanë reaguar pasi presidenti republikan, Donald Trump, mori vendim për sulme ndaj Iranit.
Anëtarja e Komitetit për Marrëdhënie me Jashtë, senatorja demokrate, Jeane Shaheen, tha ende po pret që të kuptojë shkallën e veprimit ushtarak amerikan ndaj centraleve bërthamore të Iranit.
“SHBA-ja nuk duhet të ngutet që të futet në luftë me Iranin. Fatkeqësisht, presidenti Trump nuk e ka vazhduar traditën dypartiake që rregullisht të informojë Kongresin për ngjarje të mëdha të sigurisë kombëtare që prekin amerikanët në mbarë botën. Shërbyesit publikë amerikanë - vetëm në Lindjen e Mesme, SHBA-ja ka 40.000 trupa – dhe diplomatët tanë, familjet e tyre dhe qytetarët tanë padyshim që janë më të rrezikuar pas veprimeve të sotme. Trump duhet të ulë tensionet me Iranin dhe menjëherë të informojë Kongresin”, tha ajo.
Senatori Chris Murphy, tha se javën e kaluar është informuar nga inteligjenca për zhvillimet.
“Irani nuk paraqet kërcënim të menjëhershëm për sulm ndaj SHBA-së. Irani nuk ishte afër krijimit të një arme bërthamore. Bisedimet bërthamore, që Izraeli i ndërpreu me sulmet e tij, kishin gjasa të prodhonin sukses”, shkroi ai në X.
Kongresisti Hakeem Jeffries e akuzoi presidentin Trump se e mashtroi vendin sa i përket qëllimeve të tij, “dështoi të kërkonte autorizim nga Kongresi për përdorimin e forcës ushtarake dhe rrezikon përfshirjen e Amerikës në një luftë të rrezikshme në Lindjen e Mesme”.
Iraku kritikon sulmet amerikane në Iran
Vazhdojnë reagimet nga e mbarë bota, pas përfshirjes së SHBA-së në konfliktin mes Izraelit dhe Iranit.
Iraku paralajmëroi se sulmet e SHBA-së ndaj objekteve bërthamore në Iranin fqinj rrezikojnë paqen dhe stabilitetin në Lindjen e Mesme.
“Ky përshkallëzim ushtarak paraqet kërcënim të madh për paqen dhe sigurinë në Lindjen e Mesme dhe paraqet rreziqe serioze për stabilitetin rajonal”, tha zëdhënësi i Qeverisë irakiane, Basim Alawadi.
Nëse sapo jeni bashkuar, ja ç’duhet të dini deri tani:
- Shtetet e Bashkuarame kanë goditur tre objekte bërthamore iraniane, duke u përfshirë zyrtarisht në konfliktin mes Izraelit dhe Iranit.
- Objektet e goditura janë: Fordo, Natanz dhe Esfahan.
- Presidenti Donald Trump e quajti këtë një “sukses spektakolar ushtarak”.
- Ministri i Jashtëm i Iranit, Abbas Araqchi, i cilësoi sulmet si “të turpshme” dhe paralajmëroi se ato “do të kenë pasoja të përhershme”, në një postim në X.
- Kryeministri izraelit, Benjamin Netanyahu, e përgëzoi Trumpin për sulmet “e guximshme” të SHBA-së, duke i quajtur një moment historik që mund ta çojë Lindjen e Mesme drejt paqes.
- Sekretari i Përgjithshëm i OKB-së, Antonio Guterres, tha se është “i alarmuar” nga përdorimi i forcës nga ana e SHBA-së.
- Shefja e diplomacisë së Bashkimit Evropian, Kaja Kallas, bëri thirrje për ulje të tensioneve dhe kthim në tryezën e bisedimeve.
- Edhe kryeministri i Mbretërisë së Bashkuar, Keir Starmer, i bëri thirrje Iranit të kthehet në dialog, duke theksuar se stabiliteti në Lindjen e Mesme mbetet një prioritet.
- Izraeli dhe Irani shkëmbyen një valë të re sulmesh më 22 qershor, pas sulmeve amerikane ndaj ndërtesave bërthamore të Republikës Islamike.
Kallas bën thirrje për uljen e tensioneve
Shefja e diplomacisë e Bashkimit Evropian, Kaja Kallas, bëri thirrje për ulje të tensioneve dhe kthim në tavolinën e bisedimeve, pas sulmeve amerikane në Iran.
“U bëj thirrje të gjitha palëve të tërhiqen, të kthehen në tavolinën e bisedimeve dhe të shmangin përshkallëzimin e mëtejmë”, tha Kallas.
Ajo shtoi se Irani nuk duhet të lejohet që të ketë armë bërthamore dhe se ministrat e Jashtëm të BE-së do të diskutojnë për situatën në Lindjen e Mesme të hënën.
