Izraeli dhe Irani kanë kryer një valë të re sulmesh ndaj njëri-tjetrit më 22 qershor, pasi Shtetet e Bashkuara kanë goditur objektet kryesore bërthamore të Republikës Islamike.
Ushtria izraelite tha se ka kryer një valë të re sulmesh të dielën, që kanë shënjestruar caqe ushtarake, përfshirë raketahedhës në perëndim të Iranit.
Forcat ajrore nisën “një seri sulmesh ndaj caqeve ushtarake në Iranin perëndimor”, thuhet në një deklaratë ushtarake, ku shtohet se “kanë goditur vende nga ku lëshohen raketat drejt Izraelit, ushtarë të forcave të armatosura iraniane, dhe kanë neutralizuar me shpejtësi pajisjet ushtarake që pak më parë kishin lëshuar raketa drejt Izraelit”.
Përveç në perëndim të Iranit, një zëdhënës i qendrës për menaxhimin e krizave në Kom – në Iranin qendror – njoftoi se Izraeli ka sulmuar një kazermë ushtarake.
Sipas këtij zëdhënësim katër persona janë vrarë nga ky sulm në kazermën Martiri Mustafa Khomeini.
Në këtë kazermë përfshihen ndërtesa të ushtrisë dhe të mbrojtjes ajrore që veprojnë në kuadër të Gardës Revolucionare Islamike dhe të ushtrisë iraniane. Edhe më 15 qershor ishte sulmuar kjo kazermë, sipas mediave iraniane, të cilat kishin raportuar për dy ushtarë të vrarë dhe 42 të tjerë ishin plagosur.
Ndërkaq, forcat e armatosura iraniane raportohet se kanë goditur disa caqe në Izrael, përfshirë aeroportin Ben Gurion, pasi SHBA-ja ia sulmoi objektet kryesore bërthamore.
Agjencia e lajmeve Fars raportoi se u sulmua një aeroport, “një qendër për kërkime biologjike”, bazat logjistike dhe disa qendra komanduese.
Shërbimi i shpëtimit Magen David Adom i Izraelit njoftoi se kishte “dërguar në spital 16 persona, përfshirë një burrë 30-vjeçar në gjendje mesatare, i plagosur në pjesën e sipërme të trupit nga copat e predhave”.
Televizioni publik KAN 11 transmetoi pamje të një ndërtese të shkatërruar, e rrethuar nga grumbuj rrënojash, për të cilën tha se ndodhej në qendër të Izraelit, pas dy valëve të raketave të lëshuara drejt Izraelit rreth orës 07:30 të mëngjesit.
Policia izraelite raportoi për “rënien e copave të armëve” në një zonë veriore që përfshin portin e Haifës, ku autoritetet lokale thanë se shërbimet e emergjencës po shkonin drejt “vendit të incidentit”.
Ushtria amerikane goditi më 21 qershor tre objekte bërthamore iraniane, Fordo, Natanz dhe Esfahan, gjatë një përpjekjeje të përbashkët me Izraelin për të shkatërruar programin bërthamor të Iranit, pasi diplomacia dështoi ta kthente Teheranin në tavolinën e negociatave.
Ministri i Jashtëm i Iranit, Abbas Araqchi, i quajti sulmet “të turpshme” dhe paralajmëroi se ato “do të kenë pasoja të përhershme”, në një postim në X.
Konfliktet në Lindjen e Mesme
Në këtë rubrikë mund të gjeni lajme, intervista, analiza, infografika, video dhe përmbajtje tjetër lidhur me konfliktin mes Izraelit dhe Iranit, luftës në Gazë dhe tensioneve të tjera rajonale.
