Irani thotë se duhet të përgjigjet ndaj sulmeve
Ministri i Jashtëm i Iranit, Abbas Araqchi, përsëriti qëndrimin se shteti i tij ka të drejtë të përdorë të gjitha opsionet për të mbrojtur sigurinë, duke shtuar se Teherani nuk mund t’i kthehet diplomacisë në kohën kur sulmohet nga Izraeli dhe SHBA-ja.
Araqchi tha se të hënën do të shkojë në Rusi për t’u konsultuar me Moskën për situatën.
“SHBA-ja tregoi se nuk ka aspak respekt për të drejtën ndërkombëtare. Ata kuptojnë vetëm gjuhën e kërcënimit dhe forcës”, tha Araqchi, duke shtuar se Teherani duhet të përgjigjet bazuar në të drejtat e tij, para se të rishqyrtojë rrugën diplomatike.
Ministri iranian i Jashtëm tha se do të udhëtojë për në Rusi, shtet me të cilin Irani ka partnertiet strategjik, dhe do të konsultohet me presidentin Vladimir Putin të hënën.
Katari kërkon shmangie të përshkallëzimit
Lidhur me sulmet ndaj objekteve bërthamore iraniane ka reaguar edhe Katari.
Ministria e Jashtme e Katarit u bëri thirrje të gjitha palëve të vetëpërmbahen dhe të “shmangin përshkallëzimin, të cilin populli i rajonit, i prekur nga konfliktet dhe pasojat e rënda humanitare, nuk mund ta tolerojë”.
Katari ka shërbyer si ndërmjetës kyç në luftën mes Izraelit dhe Hamasit dhe është mikpritës i bazës më të madhe ushtarake amerikane në Lindjen e Mesme.
Merz: Irani të nisë bisedimet me SHBA-në dhe Izraelin
Kancelari gjerman, Friedrich Merz, i bëri thirrje Iranit që menjëherë të nisë bisedime me SHBA-në dhe Izraelin për të gjetur një zgjidhje diplomatike për konfliktin aktual.
Sipas zëdhënësit të tij, Merz do të “koordinohet ngushtë” me partnerët e tij në SHBA dhe BE për hapat e mëtejmë sa i përket situatës në Lindjen e Mesme.
Kurti përkrah SHBA-në pas sulmeve në Iran
Kryeministri në detyrë i Kosovës, Albin Kurti, tha se shteti i tij përkrah qëndrimin e SHBA-së dhe BE-së sa i përket programit bërthamor të Iranit.
“Siguria ndërkombëtare ka nevojë për më pak armatim nuklear dhe jo më shumë bomba bërthamore që vënë në rrezik gjithë njerëzimin. Posaçërisht kur shtete autoritare zhvillojnë programe për pajisje me armatim nuklear, kjo çështje bëhet urgjente dhe alarmuese”, tha ai përmes një postimi në Facebook.
Kurti tha se SHBA-ja është partnerja e pazëvendësueshme e Kosovës dhe i mbështet vendimet e Uashingtonit.
“SHBA-ja është superfuqia superfuqia demokratike që duhen mbështetur”, tha ai.