Krasniqi thotë se programi i Kurtit nuk kishte përmbajtje
Kryetari i Partisë Demokratike të Kosovës (PDK) Memli Krasniqi, ka thënë se Kurti nuk e ka prezantuar ndonjë plan me përmbajtje, por vetëm i ka përsëritur ato që "kinse i ka realizuar" në mandatin e kaluar.
Ai i ka bërë thirrje Kurtit që sa më shpejt ta hedhë në votim atë që e ka prezantuar.
Abdixhiku: S’duam debat, mateni veten me vota
Kreu i Lidhjes Demokratike të Kosovës, Lumir Abdixhiku, tha se LDK-ja nuk do të marrë pjesë në debat për formimin e Qeverisë së re, në mënyrë që të lihet menjëherë hapësirë për votim.
“LDK-ja nuk sheh arsye për debat, nuk do të dëgjojë fare asnjë debat. Na keni thënë ‘numrat i kemi’, urdhëroni mateni veten me numra”, tha Abdixhiku.
Ai e quajti “mungesë të dinjitetit” sjelljen e mandatarit Albin Kurti, të cilin e kritikoi për prezantimin e tij, dhe tha se kjo mungesë e dinjitetit e ka bllokuar Kosovës tash e tetë muaj duke e lënë me Qeveri në detyrë.
Haradinaj: Kurti s’ka program qeverisës fare
Kryetari i Aleancës për Ardhmërinë e Kosovës (AAK) Ramush Haradinaj ka thënë se deputetët janë mbledhur sot për të kryer detyrën e tyre.
Ai e ka pyetur Kurtin se pse është rritur edhe çmimi i energjisë elektrike, dhe që lista e problemeve të Kosovës, sipas tij, “është e gjatë”.
Haradinaj ka thënë se partia e tij nuk sheh arsye për të debatuar për programin që e ka paraqitur Kurti.
Lista Serbe: Keni punuar kundër popullit serb dhe shqiptar, s’ju votojmë
Përfaqësuesi i Listës Serbe, Igor Simiq, tha se partia më e madhe e serbëve në Kosovë nuk do të votojë për Qeverinë e re të prezantuar nga mandatari Albin Kurti.
“Në qeveritë e mëparshme keni marrë qindra vendime kundër popullit serb, dhe jo vetëm kaq, por edhe kundër popullit shqiptar, prandaj kaluat në zgjedhje ashtu siç kaluat. Ne nuk do të votojmë për një qeveri të tillë”, tha Simiq.