Lexues të nderuar,
Po e mbyllim këtu mbulimin e drejtpërdrejtë të seancës së Kuvendit për zgjedhjen e Qeverisë së re.
- Seanca përfundoi pa zgjedhjen e ekzekutivit të ri, pasi mandatari, Albin Kurti, njëherësh kryeministër në detyrë, nuk i siguroi 61 votat e nevojshme.
- Partitë e mëdha shqiptare paralajmëruan qysh në nisje të seancës se nuk kanë votë për të dhe që besojnë se zgjedhjet e reja janë shpëtimi i vetëm për vendin.
- Kurti tha që nuk beson në atë skenar, pasi në mungesë të institucioneve do të rrezikohet miratimi i buxhetit të shtetit për vitin e ardhshëm dhe miliona euro fonde të huaja, për shkak të mosratifikimit të marrëveshjeve ndërkombëtare në Kuvend.
- Përgjatë prezantimit të programit dhe kabinetit të ri qeveritar, Kurti e prezantoi një ekip prej 20 ministrash, për dallim prej 15 ministrive sa i ka vendi tani.
- Votë për Kurtin nuk patën as deputetët e Listës Serbe – partisë më të madhe të serbëve në Kosovë – të cilët thanë se ai ka punuar në qeverisjet e kaluara kundër komunitetit serb.
- Për hapat e mëtejmë duhet të ndërhyjë presidentja e vendit, Vjosa Osmani. Sipas Kushtetutës, ajo tani duhet të propozojë mandatarin e dytë, por marrë parasysh se Memli Krasniqi nga Partia Demokratike e Kosovës, deklaroi sot se nuk e ka shumicën, duket se zgjedhjet e parakohshme janë të pashmangshme. Ato duhet të mbahen 40 ditë nga dita e shpalljes së tyre.
- Pjesëtarë të shoqërisë civile e kanë kritikuar Kurtin, për siç kanë thënë, zvarritjen e procesit të formimit të Qeverisë me muaj, por edhe në anën tjetër kanë thënë se nuk shohin ndryshim rezultati në zgjedhjet e reja.
- Partia e Kurtit, Lëvizja Vetëvendosje, ka fituar më së shumti vota në zgjedhjet e 9 shkurtit, por vetëm 48 ulëse në Kuvend, të pamjaftueshme për të qeverisur vetë me vendin.
Më poshtë e gjeni një video përmbledhëse të zhvillimeve kryesore në Kuvend.
Faleminderit që ishit me ne!
Çfarë mund të sjellin zgjedhjet e reja?
Ndonëse shumë pjesëtarë të shoqërisë civile e kanë kritikuar Kurtin, për siç kanë thënë, zvarritjen e procesit të formimit të Qeverisë me muaj, në anën tjetër ata nuk shohin ndryshim rezultati në rast se mbahen zgjedhjet e reja.
Agon Maliqi, njohës i zhvillimeve politike, i ka thënë të premten Radios Evropa e Lirë se nuk pret ndryshime të mëdha në rezultate.
Sipas tij, situata mund të ndryshojë vetëm në rast se Aleanca për Ardhmërinë e Kosovës dhe Nisma Socialdemokrate dështojnë që ta kalojnë pragun në Kuvend.
Të dyja këto parti kanë arritur koalicion parazgjedhor për zgjedhjet e 9 shkurtit.
Si përfundim, Aleanca i ka siguruar pesë ulëse në Kuvend, ndërsa Nisma tre të tjera.
Pragu që duhet të kalojë një parti për të hyrë në Kuvend është 5 për qind e numrit të përgjithshëm të votave.
Çka tani?
Kushtetuta e Kosovës përcakton që nëse përbërja e propozuar e Qeverisë së re nuk e merr shumicën e nevojshme të deputetëve, presidenti i Kosovës duhet të emërojë një mandatar të dytë për kryeministër brenda dhjetë ditësh, i cili i ka gjasat më të mira për të formuar Qeverinë.
Kreu i partisë së dytë të dalë nga zgjedhjet e 9 shkurtit, Memli Krasniqi nga Partia Demokratike e Kosovës, ka thënë se do t’i kërkojë presidentes Vjosa Osmani që të shkohet në zgjedhje menjëherë.
E sipas Kushtetutës, zgjedhjet duhet të mbahen brenda 40 ditëve nga data e shpalljes.
Deri atëherë, Qeveria në detyrë do t’i kryente detyrat e saj.
Murati: Modeli që kemi ofruar ne, është refuzuar
Deputeti i Lëvizjes Vetëvendosje, Hekuran Murati, njëherësh ministër në detyrë i Financave, i ka akuzuar deputetët e partive tjera se e kanë vendosur përpara inatin dhe kanë vendosur të barrikadohen në vend që ta shohin interesin shtetëror.
Ai ka thënë se partia të cilës i takon nuk është vonuar asnjë ditë dhe prej certifikimit të rezultateve i ka kryer të gjitha detyrat brenda afateve kushtetuese.
“Të gjitha zvarritjet, të gjitha vonesat, siç është parë edhe sot, kanë qenë në mënyrë që të bllokohet qoftë formimi i Kuvendit, qoftë formimi i Qeverisë nga fituesi i zgjedhjeve dhe të krijohet një ambient kur të gjitha partitë opozitare barrikadohen dhe ankohen pse nuk ka marrëveshje politike, por kur atyre u ofrohet e njëjta, ato refuzojnë”.
I pyetur pse është propozuar emri i Dimal Bashës për ministër, kur ai veçse është kryetar Kuvendi, Murati ka thënë se emri i tij për pozitën e ministrit të Infrastrukturës ka qenë i vendosur qysh më herët.
“Por, neve na është imponuar, siç e dini, edhe unë kam qenë i propozuar për postin e kryetarit të Kuvendit, kanë qenë edhe ministret [Arbërie] Nagavci e [Donika] Gërvalla, kemi qenë të propozuar si alternativa në momentin kur opozita e bllokonte konstituimin e Kuvendit, duke refuzuar votën për kandidaten për një pozitë që me Kushtetutë na takonte neve”.
