Deputetë nga LDK-ja: Nuk ka asnjë ndryshim, s’kemi votë për Kurtin
Dy deputetë të zgjedhur nga Lidhja Demokratike e Kosovës, Xhafer Tahiri dhe Alban Zogaj, thanë se nuk presin të formohet Qeveria e re në seancën e sotshme.
“LDK-ja ka pasur qëndrim konsistent që nga fillimi. Ne kemi një mbledhje të grupit paralementar, por s'ka asgjë të re. Kryeministri ka thënë që provomëni, ta provojmë sot në Kuvend”, tha Tahiri, para se të hynte në Kuvndin e Kosovvës.
Të njëjtin qëndrim e shprehu edhe kolegu i tij nga LDK-ja, Alban Zogaj.
“Nuk kemi votë për qeverisjen Kurti, as si partner. Nuk ka marrëveshje politike. Po shkojmë të votojmë, por kemi votë kundër”, tha Zogaj, duke shtuar se nuk besojmë që do të ketë votë pro nga asnjë deputet i LDK-së.
Abdixhiku: Punët e mira nuk lihen në ditën e fundit
Kryetari i Lidhjes Demokratike të Kosovës (LDK) Lumir Abdixhiku ka thënë në hyrje të Kuvendit se sot “bie perdja e mashtrimit” meqë sipas tij, Lëvizja Vetëvendosje nuk i ka votat për të formuar Qeveri të re.
“Punët e mira nuk lihen në ditën e fundit. Ja tani ku është mundësia për të parë të vërtetën. Bllokuesit e vërtetë janë ata që nuk kanë arritur ta bëjnë një shumicë të thjeshtë”, ka thënë Abdixhiku.
Sipas tij, Kosova duket se po shkon drejt zgjedhjeve të parakohshme.
Murati: Sot ose do të kemi “Kurti 3” ose do të shkojmë në zgjedhje
Deputeti i Lëvizjes Vetëvendosje, Hekuran Murati, ka lënë të kuptohet se partia e tij nuk ka arritur t'i sigurojë votat e mjaftueshme deri më tash për të formuar Qeverinë e re.
Përmes një statusi të postuar në Facebook, ai shprehu shpresën se deputetët e opozitës do të votojnë pro.
“A janë të gatshëm deputetët e opozitës që ta çojë vendin në zgjedhje dhe të rrezikojnë qëndrushmërinë e shtetit vetëm e vetëm për ta kundërshtuar Albin Kurtin? Uroj që sot të triumfojë arsyeja dhe vullneti politik tek secili deputet për të zgjedhur interesin shtetëror para së gjithash”, shkroi Murati.
Ai tha se sot janë dy opsione: formimi i Qeverisë së re ose do të shkohet në zgjedhje.
Sipas tij, për LVV-në, opsioni i preferuar është formimi i Qeverisë së re.
Deputetë të Listës Serbe nuk deklarohen për media
Deputetët e Listës Serbe, partisë më të madhe të serbëve në Kosovë, janë parë hyrë në Kuvendin e Kosovës për të marrë pjesë në seancën e thirrur në orën 10:00, por nuk janë deklaruar për media.
Ata kanë dërguar lëndë në Gjykatën Kushtetuese meqë vlerësojnë se zgjedhja e Nenad Rashiqit si nënkryetar serb, nuk është në linjë me Kushtetutën dhe rregulloret e Kuvendit.
Rashiq i takon Partisë për Liri, Drejtësi dhe Mbijetesë.
