Kusari – Lila: Nëse vazhdon bllokada, duhet dialog mes partive politike
Deputetja e zgjedhur në listën e Lëvizjes Vetëvendosje, Mimoza Kusari – Lila, drejtoi kritika për PDK-në, LDK-në dhe AAK-në, të cilat tha se janë përgjegjëse për bllokimin e formimit të institucioneve të reja.
Kusari – Lila, tha se në rast se vazhdon dështimi i konstituimit të Kuvendit duhet parë opsione tjera, përfshirë ftesën për partitë politike për të diskutuar veprimet e ardhshme.
Ajo e quajti të pakuptimtë se si partitë që ishin në opozitë mandatin e kaluar ‘po hezitojnë’ të marrin mandatet që fituan në zgjedhjet e 9 shkurtit.
Haxhiu: Duam ta korrigjojmë vendimin e gabuar të Kuvendit
Albulena Haxhiu nga LVV tha se partia e saj dëshiron që të gjejë zgjidhje për situatën e krijuar në Kuvend.
Ajo tha se edhe presidentja Osmani i ka kërkuar deputetëve që të gjejnë zgjidhje, dhe për këtë, sipas saj, “duhen konsultime”.
“Ne duam ta korrigjojmë vendimin e gabuar të Kuvendit, por duhet të shohim se si është mënyra për ta korrigjuar atë vendim”, tha ajo duke iu referuar mosmiratimit të raportit të Komisionit për verifikimin e mandateve.
“Kemi vullnet që të propozojmë mënyra se si duhet shkuar tutje. A do të jetë një komision i ri apo komisioni paraprak të bëjë përgatitjen e raportit të ri... Mund të ketë dhe propozime të tjera”, tha Haxhiu pas ndërprerjes së seancës konstituive.
Kadrijaj: LVV qëllimisht po saboton formimin e institucioneve
Deputetja e Aleancës për Ardhmërinë e Kosovës, Time Kadrijaj, tha se si subjekt politik kanë pritur që seanca të vazhdojë me votimin e raportit të 15 prillit të Komisionit për verifikim të mandateve të deputetëve e jo të ndërpritet sërish seanca.
Kadrijaj tha se kryesuesi i seancës konstituive nga radhët e Lëvizjes Vetëvendosje, Avni Dehari, veproi jashtëligjshëm kur ndërpreu seancën.
Kjo sipas tij ndodhi për shkak se Vetëvendosje nuk i ka votat as për kryetarin e Kuvendit e as për Qeverinë.
Kadrijaj, tha se Vetëvendosje qëllimisht po e ‘saboton’ formimin e institucioneve.
Krasniqi: LVV-s’ka shumicë parlamentare, po dëshiron të blejë kohë
Kryetari i PDK-së, Memli Krasniqi, tha se LVV-ja nuk ka shumicë dhe nuk është “as afër” arritjes së shumicës, prandaj sipas tij, po pengon mbarëvajtjen e seancën konstituive, për të blerë “kohë për pazare politike”.
“Skenari ka qenë i qartë, e vetmja punë që ka pasur ai [kryesuesi i seancës Avni Dehari] është që të hidhte në votim raportin e Komisionit për verifikimin e mandatave dhe kuroumit”, tha Krasniqi.
Sipas Krasniqit, përmes kryesuesit Dehari, LVV-ja po mban peng formimin e institucioneve të Kosovës.
