Haziri: Dorëheqja e kabinetit qeverisës është kërkesë kushtetuese
Lufti Haziri nga LDK-ja tha se partia nuk ndryshon qëndrimin sa i përket votimit të raportit për verifikimin e mandateve.
LDK-ja kërkon që anëtarët e Qeverisë, që janë zgjedhur deputetë, të ofrojnë dorëheqje zyrtare në Kuvend, dhe të mos mbajnë poste ekzekutive.
“Praktikisht, kjo kërkesë është kushtetuese”, tha ai, sa i përket dorëheqjes së anëtarëve të Qeverisë.
Haradinaj thotë se do të votojë si PDK dhe LDK për raportin për mandatet
Kryetari i AAK-së, Ramush Haradinaj, tha se partia e tij është e interesuar që deputetët të bëjnë betimin.
Por, tha se sipas Ligjit për Qeverinë, kryeministri në detyrë, Albin Kurti, dhe anëtarët e tjerë të ekzekutivit që janë zgjedhur deputetë është dashur që para certifikimit të rezultateve të japin dorëheqje.
Haradinaj se njohësit e ligjeve u kanë sugjeruar deputetëve që të mos votojnë raportin për mandate, sepse kjo, sipas tij, do të përbënte shkelje të ligjit.
“Do ta shqyrtojmë tani me kolegët deputetë [votimin ose jo të raportit], por AAK nuk do të ndahet, do të votojë bashkë si opozitë”, tha ai, duke iu referuar PDK-së dhe LDK-së.
Ndërkohë, pak para nisjes së seancës, Haradinaj bëri të ditur se i deputeti i zgjedhur i Partisë Unike Gorane, Adem Hoxha i bashkuar grupit parlamentar të AAK-së.
Gërvalla: Nëse të tjerët janë gati, sot e konstituojmë Kuvendin
Pak kohë para rinisjes së seancës konstituive të Kuvendit të Kosovës, Donika Gërvalla, ministre në mandatin e kaluar qeveritar, tani deputete e zgjedhur, tha se nëse PDK-ja, LDK-ja dhe AAK-ja janë gati të mos bllokojnë, atëherë ndodh konstituimi.
“Do të shohim se sa do të jetë në gjendje opozita ta respektojë procedurën dhe të mos bllokojnë”, deklaroi Gërvalla.
Gërvalla nuk dha informacione nëse Vetëvendosje ka arritur ndonjë marrëveshje me subjektet politike që votuan kundër Raportit të komisionit për verifikimin e mandateve të deputetëve, më 15 prill.
OVL-UÇK me aksion para nisjes së vazhdimit të seancës konstituive
Organizata e Veteranëve të Luftës të Ushtrisë po zhvillojnë një aksion në hyrje të Kuvendit të Kosovës.
Nga kjo organizatë po shpërndajnë një fletë në të cilën është shkruar një betim që kërkohet që deputetët e legjislaturës së nëntë ta bëjnë, për t’u angazhuar në mbrojtje të vlerave të luftës së UÇK-së.
Në këtë letër kërkohet që deputetët të adresojnë të gjitha “padrejtësitë në procesin gjyqësor kundër krerëve të UÇK-së nga Gjykata Speciale në Hagë”.
Aty po ashtu kërkohet krijimi i një mekanizmi mbikëqyrës ndaj Gjykatës Speciale, përfshirë një komision parlamentar që do të hetonte shkeljet procedurale dhe të drejtave të njeriut.
OVL-UÇK kërkon po ashtu nisjen e një debati institucional që selia e Gjykatës Speciale të kthehet në Kosovë dhe të funksionojë nën mbikëqyrjen e institucioneve të Kosovës.
