Gjermania e cilëson “incident shumë serioz” shkeljen e hapësirës polake nga Rusia
Qeveria gjermane tha se shkelja e hapësirës ajrore të Polonisë nga dronë rusë është një “incident shumë, shumë serioz”.
Autoritetet gjermane janë në kontakt me homologët në Poloni, tha zëdhënësi i Qeverisë në Berlin, Sebastian Hille.
Kjo ngjarje “tregoi edhe një herë se me çfarë lloj kërcënimi po përballemi dhe sa shumë Rusia po na teston”, tha Hille.
Ai tha se është e kuptueshme kërkesa e Polonisë për të aktivizuar nenin 4 të traktatit të NATO-s.
“Sipas nesh, kjo është plotësisht e justifikueshme dhe vë në pah se sa seriozisht ne si aleatë duhet ta marrim këtë incident”.
Ndërkaq, në një konferencë për media në Berlin ministri i Jashtëm gjerman, Johann Wadephul, tha se Rusia ka ndërmarrë një “përshkallëzim të rrezikshëm”.
“Pas tre vjetësh luftë në Ukrainë, Moska ende nuk është e gatshme që seriozisht të negociojë. Është e kundërta. Kremlini dëshiron ta nënshtrojë Ukrainën me çdo mjet të mundshëm. Ne duhet dhe do të hapim një përgjigje të qartë për këtë”, theksoi kryediplomati gjerman.
Ku janë bazat ushtarake amerikane në Evropë?
Shtetet e Bashkuara kanë prani ushtarake nëpër disa vende të Evropës, përfshirë në Poloni, shtet anëtar i NATO-s që rrëzoi disa dronë rusë mëngjesin e 10 shtatorit.
Shikoni infografikën e mëposhtme për të kuptuar se në cilat shtete gjenden bazat amerikane.
Kremlini thotë se nuk do ta komentojë incidentin në Poloni
Kremlini ka dhënë komentin e parë mbi incidentin në Poloni… por vetëm për të thënë se nuk do të komentojë.
“Ne nuk do të donim të komentonim për këtë”, tha zëdhënësi i Kremlinit, Dmitry Peskov, gjatë një konference të përditshme me gazetarët.
“Kjo nuk është çështje për ne. Është një çështje për Ministrinë [ruse] të Mbrojtjes”, shtoi ai.
I pyetur për akuzat e ngritura ndaj Moskës, Peskov u përgjigj: “Udhëheqësia e BE-së dhe e NATO-s e akuzojnë Rusinë për provokime çdo ditë, zakonisht pa u mbështetur në fakte”.
Rutte: Shkelja e hapësirës ajrore të Polonisë nga Rusia, absolutisht e rrezikshme
Shefi i NATO-s, Mark Rutte, ka thënë se shkelja e hapësirës ajrore të Polonisë nga dronët rusë ishte "absolutisht e rrezikshme".
Ai tha se mbrojtja ajrore e NATO-s “u aktivizua dhe siguroi me sukses mbrojtjen e territorit të Aleancës, ashtu siç është e parashikuar të bëjë”. Sipas tij, disa aleatë të NATO-s morën pjesë në rrëzimin e dronëve rusë, përfshirë Holandën, Italinë, Poloninë dhe Gjermaninë.
Rutte theksoi se ende nuk është bërë një vlerësim i plotë i incidentit.
"Pavarësisht nëse ishte e qëllimshme apo jo, është absolutisht e pakujdesshme, absolutisht e rrezikshme. Por, vlerësimi i plotë është ende duke u kryer", tha Rutte.
"Mesazhi im për Putinin është i qartë: ndalo luftën në Ukrainë. Ndalo së shkeluri hapësirën ajrore të aleatëve. Dhe, dije se ne jemi të gatshëm, jemi vigjilentë dhe do të mbrojmë çdo centimetër të territorit të NATO-s".
