Në cilat pjesë të vendit i rrëzoi Polonia dronët rusë?
Polonia i rrëzoi disa dronë rusë gjatë mëngjesit të mërkurën, të cilët ishin futur në hapësirën e saj ajrore gjatë një sulmi rus në Ukrainën perëndimore.
Në këtë hartë mund të mësoni se në cilat pjesë të Polonisë u rrëzuan dronët.
Polonia kërkon aktivizimin e Nenit 4 të Traktatit të NATO-s
Kryeministri i Polonisë, Donald Tusk, tha në parlament se gjatë natës janë shënuar 19 hyrje të paautorizuara në hapësirën ajrore polake, pjesa më e madhe e dronëve duke ardhur nga Bjellorusia. Ai shtoi se është konfirmuar rrëzimi i tre dronëve, ndërsa një i katërt ka shumë gjasa të jetë goditur.
“Fakti që këta dronë, të cilët paraqisnin kërcënim për sigurinë, u rrëzuan, e ndryshon situatën politike. Për këtë arsye, konsultimet me aleatët morën formën e një kërkese zyrtare për aktivizimin e Nenit 4 të Traktatit të NATO-s”, tha Tusk.
Neni 4 i Traktatit të NATO-s thotë se "Palët do të këshillohen bashkërisht kurdoherë që, sipas mendimit të cilësdo prej tyre, kërcënohet integriteti territorial, pavarësia politike apo siguria e cilësdo prej palëve".
NATO: Për herë të parë avionët përballen me kërcënime në hapësirën ajrore të një aleati
NATO ka thënë se është në kontakt të ngushtë me Poloninë dhe aleatët e tjerë pas hyrjes së disa dronëve në hapësirën ajrore polake gjatë një sulmi rus në Ukrainën perëndimore.
Në një deklaratë të publikuar të mërkurën, gjenerali i Forcës Ajrore të Shteteve të Bashkuara, Alexus Grynkewich – komandanti më i lartë ushtarak i NATO-s – tha se Aleanca po e ndjek nga afër situatën.
Një zëdhënës i NATO-s shtoi se ishte hera e parë që avionët e saj janë angazhuar përballë kërcënimeve të mundshme brenda hapësirës ajrore të një aleati.
Çfarë ndodhi në Poloni?
- Gjatë natës, një “numër i madh” dronësh rusë u rrëzuan mbi hapësirën ajrore të Polonisë, tha kryeministri i vendit, Donald Tusk.
- Duke folur para një mbledhjeje emergjente, Tusk tha se kjo ishte hera e parë që dronë rusë u rrëzuan mbi Poloni.
- Polonia mbylli përkohësisht hapësirën ajrore dhe nisi një operacion ushtarak, ku u përfshinë edhe avionë të NATO-s dhe holandezë. Banorët në tri rajone polake përgjatë kufirit me Ukrainën u udhëzuan të qëndronin në shtëpi.
- Presidenti i Ukrainës, Volodymyr Zelensky, tha se ky ishte “një tjetër hap i përshkallëzimit” nga Rusia.
- Forcat ajrore ukrainase thanë se sulmi rus përfshinte 415 dronë, një raketë balistike dhe 42 raketa lundruese, dhe se “tetë UAV [dronë] të armikut kaluan kufirin shtetëror të Ukrainës duke fluturuar drejt Polonisë”.
- Aeroportet polake janë rihapur që nga atëherë dhe operacioni ushtarak ka përfunduar.
- Rusia ende nuk ka komentuar.