Lista Serbe: Po shkelen të drejtat e serbëve në Kuvend
Deputeti i Listës Serbe, Igor Simiq, publikoi në profilin e tij në Instagram një video nga seanca e Kuvendit dhe tha se “po vazhdon votimi në kundërshtim me rregullat, për ta futur (Nenad) Rashiqin si nënkryetar të Kuvendit”.
"Po shkelen të gjitha rregullat, po shkelen të drejtat e popullit serb, dhe Rashiq në këtë po merr pjesë drejtpërdrejt bashkë me Vetëvendosjen në pushtet. Kurti po e shtyn të preferuarin e tij në postin e nënkryetarit”, tha Simiq.
Lista Serbe, përndryshe, nuk merr pjesë në votim.
Sipas Rregullores së Kuvendit, kandidati për nënkryetar nga radhët e komunitetit serb propozohet nga shumica e deputetëve të këtij komuniteti. Rashiq nuk e ka mbështetjen e Listës Serbe.
Dështon edhe Zllatan Ellek
As kryetari dhe deputet i Listës Serbe, Zllatan Ellek, nuk ka marrë ndonjë votë për nënkryetar të Kuvendit të Kosovës.
Në dy tentime radhazi, kundër Ellekut votuan 54 deputetë, ndërsa 19 të tjerë abstenuan.
Sa për dijeni, Kuvendi është duke i hedhur në votim përmes shortit deputetët e Listës Serbe.
Në seancën e kaluar, Lista Serbe nuk pranoi të propozonte ndonjë kandidat pos Sllavko Simiqit.
Simiq nuk i mori votat e nevojshme kur u hodh në votim.
Branisllav Nikolliq dështon të zgjidhet nënkryetar i Kuvendit
Deputeti nga Lista Serbe, Branisllav Nikolliq, nuk e mori asnjë votë për nënkryetar të Kuvendit të Kosovës.
Ai u hodh në votim me short tri herë dhe në secilin rast mori zero vota për. Kjo nënkupton se ai ra nga gara për nënkryetar.
Kuvendi nis punimet
Vazhdimi i seancës konstituive të Kuvendit të Kosovës sapo ka filluar.
Në këtë seancë pritet zgjedhja e nënkryetarit të pestë dhe të fundit të Kuvendit.
Nënkryetari duhet të zgjidhet nga pakica serbe, gjë që deputetët kishin dështuar ta bënin në seancën e kaluar.
Nëse zgjidhet nënkryetari i pestë, atëherë Kuvendi do të jetë përfundimisht i konstituuar.
Në sallë janë 107 deputetë.