Haziri: Duhet një marrëveshje politike që të zhbllokohet situata
Deputeti i LDK-së, Lufti Haziri, tha se duhet të punohet që të arrihet një marrëveshje politike në mënyrë që të zhbllokohet situata e krijuar.
Para seancës, ai tha se duhet të arrihet një marrëveshje “që i garanton të propozuarit që mund të zgjidhet”.
I pyetur për propozimin e AAK-së për një konsultë mes partive politike, Haziri tha se nisma është e mirëpritur, por insistoi se situata nuk zgjidhet pa marrëveshje politike.
Partitë politike janë të detyruar të bashkëpunojnë, tha Haziri, duke kujtuar se rezultati zgjedhor nuk i mundëson asnjë partie të ketë shumicën parlamentare vetëm.
“Partia e parë duhet të hulumtojë rrugë, të gjejë rrugë” drejt një marrëveshjeje politike, tha ai.
Haxhiu: S’do të jem kandidate për kryeparlamentare
Deputetja e LVV-së, Albulena Haxhiu, tha se sot emri i saj sot nuk do të propozohet për kryeparlamentare.
“Unë jo”, tha shkurt ajo kur u pyet nga gazetarët se kush do të jetë i propozuari nga LVV-ja për postin e kreut të Kuvendit.
Ndërkaq, Haxhiu tha se në seancë do të kuptohet se kush do të propozohet.
Zyrtarë të tjerë të LVV-së thanë më herët se në mbledhjen e grupit parlamentar, para nisjes së seancës, do të vendoset se kush do të kandidohet.
Haradinaj: Do të kërkojmë konsultë me grupet parlamentare
Kryetari i Aleancës për Ardhmërinë e Kosovës, Ramush Haradinaj, ka bërë të ditur se partia e tij do të kërkojë, para nisjes së seancës, konsultë me partitë e përfaqësuara në Kuvend.
Sipas Haradinajt, në këtë konsultë duhet të diskutohet për kandidaturat dhe të mos shkohet në seancë pa e ditur paraprakisht emrin e kandidatit që Vetëvendosje do ta propozojë për kryetar të Kuvendit.
Haradinaj tha se partia e tij ka edhe emra të tjerë nga Vetëvendosja, të cilët do t’i votonte për kryetar të Kuvendit.
“Kemi shumë emra të tjerë në Vetëvendosje që do t’i votonim”, tha Haradinaj.
Mustafa: S’votojmë asnjë kandidat pa marrëveshje politike
Deputeti i LDK-së, Besian Mustafa, tha se partia e tij nuk voton asnjë kandidat për kryeparlamentar pa një marrëveshje paraprake politike.
“Do të shohim nëse LVV-ja do të gjejë një kompromis” për konstituimin e Kuvendit, pra votimin e Kryesisë së organit ligjvënës, tha Mustafa para nisjes së vazhdimit të seancës konstituive.
LDK-ja më herët ka refuzuar një ofertë të LDK-së për bashkëpunim.