Përshëndetje të nderuar lexues,
Po e nisim mbulimin e drejtpërdrejt të vazhdimit të seancës konstitutive të përbërjes së re parlamentare të dalë nga zgjedhjet e shkurtit.
Ky është vazhdimi i dytë i seancës konstituive, pasi Gjykata Kushtetuese publikoi aktgjykimin e plotë lidhur me moskonstituimin e Kuvendit më 18 gusht.
Nga 18 gushti, deputetët kanë 30 ditë kohë që të përmbyllin konstituimin e Kuvendit.
Gjykata ka urdhëruar që seanca të vazhdojë me zgjedhjen e kryeparlamentarit përmes votimit të hapur.
Kushtetuesja po ashtu vendosi që emri i një kandidati nuk mund të hidhet në votim më shumë se tri herë.
Në vazhdimin paraprak të mbajtur më 20 gusht, Lëvizja Vetëvendosje propozoi Albulena Haxhiun dhe Donika Gërvallën për kryeparlamentare. Asnjëra nga kandidatet nuk mori 61 votat e nevojshme.
Qëndroni me ne!
Partitë me akuza të ndërsjella
Pas seancës së 20 gushtit, LVV-ja akuzoi PDK-në, LDK-në, AAK-në dhe Listën Serbe se po bllokojnë zgjedhjen e kryeparlamentarit.
Partia e kryeministrit në detyrë, Albin Kurti, tha se u vërtetua se problemi nuk ishte tek emri i Albulena Haxhiut – e cila edhe në seancat paraprake nuk ka marrë votat e nevojshme.
Partitë që mandatin e kaluar ishin në opozitë e akuzuan LVV-në se qëllimshëm ka kandiduar Haxhiun dhe Donika Gërvallën, pasi thanë se partia fituese e zgjedhjeve e ka ditur se ato nuk kanë vota.
Më poshtë mund të shihni një video që përmbledh gjithçka që ndodhi në seancën e 20 gushtit:
Qëndrimet e partive politike për kandidatët e LVV-së
Partitë vazhdojnë të mbesin në qëndrimet e tyre sa i përket zgjedhjes së kreut të ri të Kuvendit të Kosovës.
PDK-ja thotë se s’ka votë për asnjë kandidatë të LVV-së që ka qenë pjesë e Qeverisë të legjislaturës së kaluar.
LDK-ja vazhdon të insistojë se nuk do të votojë asnjë kandidat të LVV-së nëse nuk ka një marrëveshje për një qeveri të unitetit.
AAK-ja thotë se ka votë për kandidatë të caktuar të LVV-së, sikurse Glauk Konjufca, Shqipe Selimi dhe Saranda Bogujevci.
Ndërkaq, Nisma Socialdemokrate – që më herët ka mbajtur edhe negociata me LVV-në – insiston në një marrëveshje politike me LVV-së në këmbim të votës për kryeparlamentar.
Por, a kanë përgjegjësi edhe këto parti për bllokadën e krijuar? Mësoni më shumë në tekstin e mëposhtëm:
Avdyli i Guxo: Duhet të shkojmë në zgjedhje sa më shpejt
Para nisjes së vazhdimit të seancës konstituive, Haxhi Avdyli, deputet i partisë Guxo – pjesë e koalicionit parazgjedhor me LVV-në – tha se ndryshimi i emrit të kandidatit për kryeparlamentar nga LVV-ja seancën e kaluar, bëri që “farsa” e partive të tjera “mbaroi”.
Ai kërkoi që vendi të mbajë sa më shpejt zgjedhje të reja parlamentare.
“Ata [partitë që mandatin e kaluar ishin në opozitë] janë bllokuesit e shtetit, ne duhet të shkojmë në zgjedhje sa më shpejt dhe qytetarët t’ua tregojnë vendin me më shumë se 51 për qind”, tha ai.
PDK, AAK kanë kërkuar që LVV-ja të ndryshojë emrin e kandidatit për kryeparlamentar, pasi në të kaluarën kjo parti kishte insistuar vetëm në kandidimin e Albulena Haxhiun.
“LDK-ja po ashtu ka thënë që nuk voton asnjë kandidat të LVV-së. Donika Gërvalla është e partisë Guxo. Kjo bie në ujë. Qytetari po e sheh se kush është bllokuesi”, tha Avdyli.
I pyetur nga gazetarët se kush do të propozohet sot për kryeparlamentar nga LVV-ja, Avdyli tha se tani kanë mbledhjen e grupit parlamentar, ku do të diskutohet kjo çështje.