Pamjet e para pas sulmit në Katar
Në këtë pamje të siguruar nga agjencia e lajmeve AFP shihet ajo çfarë ka mbetur nga raketa iraniane e rrëzuar mbi Katar. Autoritetet amerikane kanë thënë se nuk ka raportime për viktima.
Shtetet rajonale dënojnë sulmin e Iranit në bazën amerikane në Katar
Shumë shtete të Lindjes së Mesme dhe Afrikës së Veriut e kanë dënuar sulmin iranian në bazën amerikane në Katar.
Egjipti e ka quajtur sulmin “shkelje të sovranitetit të Katarit, kërcënim për integritetin e tij territorial dhe shkelje të ligjit ndërkombëtar”.
Arabia Saudite ka thënë se sulmi përbën shkelje të “parimit të fqinjësisë së mirë dhe është krejtësisht i papranueshëm, dhe akt që nuk mund të justifikohet”.
Jordania e ka dënuar atë që e ka përshkruar si “agresion të nisur nga Irani kundër shtetit të binjakëzuar Katarit”.
Bahrejni ka thënë se ofron mbështetje të plotë dhe solidarizohet me Katarin “duke reflektuar lidhjet e ngushta të vëllazërisë mes tyre”.
Një zëdhënës i Ministrisë së Jashtme të Omanit e ka dënuar atë që e ka përshkruar si përshkallëzim rajonal.
Katari: Nuk ka arsye për shqetësim
Ministria e Brendshme e Katarit e ka lëshuar një deklaratë duke thënë se “konfirmon se situata e sigurisë në shtet është stabile dhe nuk ka arsye për shqetësim”.
“Ministria thekson rëndësinë e mosdorëzimit ndaj thashethemeve që janë duke qarkulluar informacion të pavërtetë”, është thënë në deklaratë.
Ministria e Brendshme ka thënë se do të koordinohet me autoritete tjera të Katarit për të “garantuar sigurinë e qytetarëve dhe për kthim të normalitetit”.
Sulmi i Iranit në bazën ajrore amerikane në Katar, tejet simbolik
Sulmi raketor iranian në bazën ajrore amerikane Al Udeid në Katar ishte akt tejet simbolik, i kalibruar me kujdes për të dërguar mesazh vendosmërie, por edhe për të shmangur një konflikt më të gjerë dhe shkatërrues.
Irani ka thënë se numri i raketave të nisura më 23 qershor ka qenë i njëjtë me numrin e bombave të nisura nga Shtetet e Bashkuara në qendrat bërthamore iraniane, duke sinjalizuar se synon përgjigje proporcionale dhe jo përshkallëzim të situatës në mënyrë të pakontrolluar.
Kjo simetri në veprime e vë në pah dëshirën e Iranit për të demonstruar se do të përgjigjet për sulmet që janë kryer në tokën e vet, por edhe që nuk e dëshiron një lufë të shkallës së gjerë.
Analizën e plotë e gjeni në linkun më poshtë:
