Nis mbyllja e vendvotimeve për zgjedhjet lokale në Kosovë
Në 38 komuna të Kosovës ka nisur mbyllja e qendrave të votimit, pasi qytetarët për 12 orë kishin mundësi që të zgjidhnin udhëheqësit e rinj komunalë dhe përbërjet e reja të kuvendeve komunale.
Si rëndom, në qendrat ku ka ende votues, ato do të mbeten të hapura edhe pas orës 19:00, derisa të gjithë të kenë shfrytëzuar të drejtën e tyre për të votuar.
Dalja deri në orën 18:00 është rreth 33 për qind, teksa Komisioni Qendror i Zgjedhjeve pritet të njoftojë për pjesëmarrjen përfundimtare në zgjedhje dhe ecurinë e procesit gjatë konferencës së planifikuar për në orën 19:30.
Exit poll-et: Mitrovicën e Jugut e merr në rund të parë PDK-ja
Sipas tri exit poll-eve të publikuara nga Klan Kosova, TV Dukagjini dhe T7, në Mitrovicën e Jugut është parashikuar që Arian Tahiri nga Partia Demokratike e Kosovës ta fitojë garën në rund të parë me mbi 51 për qind të votave.
Exit poll-et: Në Prishtinë shkon në balotazh Rama dhe Çeku
Përparim Rama nga Lidhja Demokratike e Kosovës dhe Hajrulla Çeku nga Lëvizja Vetëvendosje pritet të përballen në balotazhin e 9 nëntorit për udhëheqjen e Prishtinës.
Kështu thuhet në exit poll-et e publikuara nga Klan Kosova, TV Dukagjini dhe T7. Sipas këtyre parashikimeve, Rama ka një epërsi të vogël ndaj Çekut.
Parashikohet që LDK-ja ta marrë Lipjanin pa balotazh
Kandidati i Lidhjes Demokratike të Kosovës, Imri Ahmeti, pritet të fitojë në rund të parë komunën e Lipjanit.
Kështu thuhet në exit poll-et e publikuara nga Klan Kosova dhe T7.