Mbi 16% e qytetarëve votuan deri në orën 13:00
Në faqen zyrtare të Komisionit Qendror të Zgjedhjeve njoftohet se deri në orën 13:00, pjesëmarrja në zgjedhje ishte 16.45%.
Kjo shifër përfshin vetëm votat e hedhura në vendvotimet e rregullta dhe nuk përfshin votat me kusht, ato të personave me nevoja të veçanta, apo votat me postë.
Reagimet e udhëheqësve pas votimeve
Presidentja e Kosovës, Vjosa Osmani, e cilësoi ditën e zgjedhjeve si një moment të rëndësishëm për forcimin e demokracisë në vend.
“Sa më e madhe pjesëmarrja dhe sa më i rregullt procesi, aq më e fortë është demokracia jonë”, tha ajo.
Osmani theksoi se institucionet e Kosovës do të bëjnë gjithçka për të garantuar të drejtën e votës për të gjithë qytetarët, duke rikujtuar se Serbia ka tentuar vazhdimisht të ndërhyjë në proceset zgjedhore.
Kryeministri në detyrë, Albin Kurti, iu drejtua gazetarëve në shqip, serbisht dhe anglisht, duke ftuar të gjithë qytetarët, pa dallim, që të marrin pjesë në zgjedhje.
“Votojmë për të vendosur për katër vjetët e ardhshëm në komunat tona”, tha ai.
Kryetari i Kuvendit të Kosovës, Dimal Basha, theksoi se pjesëmarrja masive është mënyra më e drejtëpërdrejtë për të ndikuar në vendimet që prekin jetën e përditshme.
“Le të jetë kjo ditë festë e demokracisë, me votime të qeta, pjesëmarrje të lartë dhe me frymë të plotë qytetarie”, shkroi Basha në Facebook.
