Starmer i bën thirrje Iranit të kthehet në tavolinën e bisedimeve
Kryeministri i Mbretërisë së Bashkuar, Keir Starmer, i bëri thirrje Iranit që të kthehet në tavolinën e bisedimeve, duke shtuar se stabiliteti në Lindjen e Mesme mbetet prioritet.
“Programi bërthamor i Iranit paraqet kërcënim të madh për sigurinë ndërkombëtare. Irani nuk duhet të lejohet kurrë që të zhvillojë armë bërthamore dhe SHBA-ja ka ndërmarrë veprime për ta minimizuar këtë kërcënim”, tha Starmer, sipas një njoftimi të lëshuar nga zyra e tij.
Shefi i OKB-së “i alarmuar” pas sulmeve amerikane
Sekretari i Përgjithshëm i OKB-së, Antonio Guterres, tha se është “i alarmuar” nga përdorimi i forcës nga SHBA-ja.
“Ekziston një rrezik në rritje që ky konflikt të dalë shpejt jashtë kontrollit, me pasoja katastrofike për civilët, rajonin dhe botën”, tha Guterres.
“Nuk ka zgjidhje ushtarake. Rruga e vetme përpara është diplomacia”, shtoi ai përmes një postimi në X.
Libani thotë se s’dëshiron të përfshihet në konflikt
Reagime për sulmet amerikane në Iran ka pasur edhe nga Libani, shtet që gjendet në kufi me Izraelin.
Kryeministri i këtij shteti, Nawaf Salam, tha se Libani nuk duhet të përfshihet në konflikt, nëse ai përhapet në mbarë rajonin e Lindjes së Mesme.
“Për ne është gjithnjë e më e rëndësishme që t’i përmbahemi interesit më të lartë kombëtar, që është nevoja për të shmangur përfshirjen e Libanit... në konfrontimin rajonal, në çfarëdo forme”, tha Salam.
Rebelët Huthi dhe Hamasi dënojnë sulmet amerikane
Grupi radikal palestinez, Hamas, dhe rebelët jemenas Huthi, kanë dënuar sulmet amerikane ndaj objekteve bërthamore të Iranit.
Dy grupet, që mbështeten nga Irani, janë të shpallura organizata terroriste nga SHBA-ja.
Reblët Huthi u zotuan për mbështetjen e Iranit në luftën e tij kundër “sionistëve dhe agresionit amerikan”.
Byroja politike e grupit jemenas u bëri thirrje shteteve myslimane që të bashkohen në një front të përbashkët, kundër Izraelit dhe SHBA-së.
