Duda Bale: S’e kam plan të votoj për asnjë kandidat nga pakica serbe
Deputetja e Unionit Socialdemokrat nga radhët e komunitetit boshnjak, Duda Bale, ka thënë se nuk do të votojë për asnjë kandidat nga pakica serbe për nënkryetar të Kuvendit të Kosovës.
E pyetur nëse do të votonte për Nenad Rashiqin, Bale tha se “nuk kam votë për asnjë kandidat nga pakica serbe”.
Bale tha gjithashtu se “nuk mendoj që do të dalim lehtë nga kjo krizë”.
Sa për dijeni, një nga pesë nënkryetarët e Kuvendit të Kosovës i takon pakicës serbe.
Konstituimi i Kuvendit është buzë përmbylljes dhe nevojitet vetëm edhe zgjedhja e kandidatit të pestë, nga pakica serbe, për t’u arritur kjo.
Krasniqi: PDK e votoi Bashën për ta zhveshur LVV-në
Deputeti i Kuvendit të Kosovës nga radhët e Partisë Demokratike të Kosovës (PDK), njëherësh kryetar i kësaj partie, Memli Krasniqi, ka arsyetuar votën e partisë së tij për zgjedhjen e Dimal Bashës së Lëvizjes Vetëvendosje (LVV) në postin e kryeparlamentarit.
"Vota jonë nuk ka qenë për individin – por për të mbajtur zotimin e dhënë para qytetarëve, me qëllim të dhënies fund bllokadës institucionale. Por, edhe për ta zhveshur Vetëvendosjen dhe për ta vënë para reflektorit publik të së vërtetës. Sepse, gjatë janë fshehur e amnistuar prapa Glaukave, por në fakt këta janë Dimala. Nëse ndokush ka pasur dyshime, qoftë edhe brenda elektoratit të tyre, sot besoj e kanë të qartë këtë", ka shkruar Krasniqi në Facebook.
"Prandaj, turpi i mbetet Vetëvendosjes dhe Albin Kurtit, të cilët me insistim e kandiduan Dimal Bashën. Por, një gjë po vërtetohet edhe tash, siç e kishim thënë në dy herët e kandidimit të tij - ai nuk është i denjë që të jetë Kryetar i Kuvendit", ka thënë Krasniqi.
Deklaratat e Krasniqit vijnë pas një punim i Bashës i vitit 2012 nxit reagime në Kosovë, ndërsa Basha u distancua nga artikulli kundër Ushtrisë Çlirimtare të Kosovës (UÇK).
"Sa për PDK-në, partinë që e pasoi UÇK-në, pavarësisht gjithçkaje e çdo zhurme, do ta mbrojmë me çdo kusht, si çdo herë tjetër, luftën e UÇK-së dhe shtetin e Kosovës", u shpreh Krasniqi.
Ai ka akuzuar LVV-në për qëndrime të vazhdueshme kundër UÇK-së:
"Nëse është dikush që e ka pasur mënyrë jetese demonizimin e UÇK-së dhe të udhëheqësve të saj, ai është Albin Kurti. Rrjedhimisht, gati secili që i është bashkuar atij, ka pasur ose ka përvetësuar të njëjtin mentalitet.
Shembulli i propozimeve nga Lëvizja Vetëvendosje për Kryetar të Kuvendit e tregon më së miri: Albulena Haxhiu, Donika Schwartz, Hekuran Murati – të tre me qëndrime dhe veprime kundër UÇK-së dhe trashëgimisë së saj. Njëra duke ua zvogëluar fondet e mbrojtjes në Gjykatën e Hagës, tjetra duke pranuar se ka dorëzuar dosje kundër krerëve të UÇK-së, e tjetri duke përjashtuar nga paga minimale kategoritë e luftës çlirimtare dhe duke i fyer luftëtarët e lirisë në krahasimet që ua bënte me mercenarë.
Edhe Kryekuvendari i ri, me artikullin e tij morbid kundër UÇK-s, i cili doli dje në pah, vetëm sa e konfirmon filozofinë e Vetëvendosjes: sa më shumë të distancohesh nga UÇK-ja, aq më shpejt ngjitesh në parti. Kjo edhe mund të jetë formula e tyre e brendshme".
Bekë Berisha për Rashiqin: Shohim
Bekë Berisha, deputet i Aleancës për Ardhmërinë e Kosovës, nuk ka treguar nëse do të votojë apo jo për Nenad Rashiqin për nënkryetar të Kuvendit të Kosovës.
“Do të shohim, sepse unë vërtet nuk e njoh. Kjo gjendje është e paqartë. Pas bisedime që do t’i kemi me kolegët tanë do të shohim se si ta zgjidhim këtë gjendje”, tha Berisha.
Ai shtoi se “ ne ngulim këmbë ende, pasi është tejkaluar një pengesë, duhet t’iu numërohen ditët Albin Kurtit, sepse ai nuk i ka votat për Qeveri”.
Izmaku: Basha të japë dorëheqje ose të shkarkohet
Deputetja e Kuvendit të Kosovës nga radhët e Nismës Socialdemokrate, Xhevahire Izmaku, ka kërkuar largimin e kryeparlamentarit Dimal Basha nga posti që mori dy ditë më parë.
Një punim i vitit 2012, në të cilin bashkautor ishte edhe Basha i Lëvizjes Vetëvendosje, ka nxitur reagime të shumta në Kosovë. Në punimin me titullin: “Globalizmi në Ballkanin Perëndimor: Krimi transnacional, islami fundamentalist dhe aleancat e padrejta”, thuhej se “sipas rasteve të hetuara, fondet për UÇK-në erdhën nga shqiptarë të zakonshëm në diasporë, por edhe nga trafikantët e drogës që operonin në gjithë Evropën Perëndimore dhe në Shtetet e Bashkuara”.
Pas raportimeve nga mediat për këtë punim, Basha mohoi se ka shkruar ndonjëherë kundër Ushtrisë Çlirimtare të Kosovës. Të enjten, në një konferencë për media, ai u distancua sërish nga artikulli kundër UÇK-së.
"Jo, nuk kalon ky turp me një konferencë për shtyp! Dorëheqje ose shkarkim!", ka shkruar Izmaku në Facebook.
"Kërkoj që jo vetëm ne që ngritëm dorën kundër, por edhe njerëzit me gjykim të shëndoshë dhe ata që e duan vendin e sakrificën e UÇK-së, edhe brenda VV-së, të kërkojnë dorëheqjen e menjëhershme të Dimal Bashës", është shprehur ajo.
"Një njeri që ka bashkautorësi në punime shkencore kundër UÇK-së, në linjë me Serbinë, Dik Martyn dhe Rusinë, nuk mund dhe nuk guxon të udhëheqë Kuvendin e Kosovës", ka thënë Izmaku.
Deputetja e Nismës ka thënë se Partia Demokratike e Kosovës (PDK) dhe Aleanca për Ardhmërinë e Kosovës (AAK), deputetë të të cilave votuan për zgjedhjen e Bashës kryeparlamentar, duhet të japin llogari për, siç ka thënë ajo, "këtë shkarje të rëndë".
"Punimet shkencore nuk botohen me bashkautorësi pa besim dhe pa përputhje në qëndrime. Me votën e tyre, ata e bënë këtë narrativë pjesë të institucionit më të lartë të vendit", është shprehur Izmaku.