Lufta e Putinit në Ukrainë zhyt ekonominë ruse në krizë
Rusët po përgatiten për një recesion ekonomik që mund të jetë më i madhi që nga viti 1990, pasi Shtetet e Bashkuara dhe aleatët e saj vendosën sanksione “dërrmuese” ndaj Moskës, në përpjekje për ta ndëshkuar presidentin rus, Vladimir Putin, për pushtimin e paprovokuar të Ukrainës.
Lexoni më shumë në linkun më poshtë.
Maqedonia e V. miraton deklaratën për Ukrainën
Kuvendi i Maqedonisë së Veriut ka miratuar të enjten një deklaratë më të cilën dënohen sulmet ushtarake ruse kundër Ukrainës.
Për deklaratën votuan 100 deputetë, kurse tre ishin kundër; dy deputetët e partisë “E Majta” dhe një deputet i Partisë Demokratike Serbe.
Deputeti i Partisë Demokratike Serbe, Ivan Stoilkoviq e quajti deklaratën “hipokrizi të politikanëve”.
Maqedonia e Veriut u është bashkuar edhe sanksioneve të BE-së ndaj Rusisë, duke ndërprerë të gjitha fluturimet nga Moska, ndërsa janë ndërmarrë edhe masa tjera për bllokimin e transaksioneve financiare të kompanive dhe afaristëve rusë.
Drejtuesit e institucioneve të Maqedonisë së Veriut e kanë dënuar agresionin rus në Ukrainë si “kërcënim për paqen dhe stabilitetin në botë”.
Putin: Operacioni rus po shkon sipas planit
Presidenti rus, Vladimir Putin, ka thënë të enjten se “operacioni special ushtarak” në Ukrainë është duke shkuar sipas planit dhe i ka konsideruar ushtarët rusë si heronj. Komentet televizive të Putinit kanë qenë në kundërshtim me deklaratat e qeverive të Perëndimit dhe agjencive të inteligjencës se fushata ushtarake e Putinit po përballet me probleme logjistike, gabime taktike dhe rezistencë më të madhe sesa është pritur nga Ukraina.
Britania: Rusia, shumë mbrapa planit
Presidenti rus, Vladimir Putin ka thënë të enjten se “operacioni special ushtarak” në Ukrainë është duke shkuar sipas planit.
Sekretari britanik i Mbrojtjes, Ben Wallace mendon krejt ndryshe.
Ai ka thënë për BBC-në se Rusia është shumë mbrapa planit.
“Pavarësisht shkatërrimeve ditore dhe bombardimeve në zona të civilëve në disa qytete, ukrainasit dalin gjatë ditës, vlerësojnë forcat e tyre, i largojnë disa raste dhe vazhdojnë luftën”, ka thënë ai.
“Rusia është duke mbledhur një numër të madh, jo vetëm të vdekjeve, por edhe të dezertimeve dhe njerëzve që dorëzohen dhe një numër të madh të pajisjeve të shkatërruara”, ka shtuar ai.
Sa i përket Putinit, Wallace ka thënë se ai është njeri i mbështjellë në sanksione për shkak të veprimeve të veta.
“Ai është njeri që ka shkelur secilin ligj ndërkombëtar. Ai është secilën herë e më i izoluar”.