Macron i thotë Putinit se po bën “gabim serioz”
Më herët kemi raportuar se presidenti rus, Vladimir Putin ka zhvilluar një bisedë telefonike me presidentin francez, Emmanuel Macron.
Sipas versionit francez, Putin ka pretenduar se operacioni është duke shkuar sipas planit dhe “në ritmin që do ai”.
Macron i ka thënë Putinit se “është duke bërë gabim serioz” dhe ka shtuar se Qeveria ukrainase nuk është, siç pretendon Rusia, regjim nazist, duke shtuar se qëndrimi i tij nuk reflekton realitetin, ka thënë Pallati Elysee.
Presidenti francez ka thënë se është i shqetësuar për ndikimin në civilë, duke përfshirë bombardimin rreth Kievit – diçka që Putin e ka mohuar.
Macron i ka thënë homologut të tij se Rusia do të përfundojë “shtet shumë i izoluar dhe i dobët” nën sanksione, sipas Pallatit francez.
Macron ka folur edhe me presidentin ukrainas, Volodymyr Zelensky – i cili ka thënë se shteti i tij nuk do të dorëzohet, por mbetet i hapur për dialog.
BE miraton masa urgjente për të mbrojtur refugjatët ukrainas
Bashkimi Evropian është pajtuar për të ofruar mbrojtje të përkohshme për qindra mijëra refugjatët që hyjnë në bllokun evropian, teksa tentojnë t’i ikin pushtimit rus dhe bombardimeve në qytetet përreth Ukrainës.
Komisionarja e BE-së për Çështje të Brendshme, Ylva Johansson e ka konsideruar vendimin “historik” më 3 mars, pas një takimi që ka zhvilluar me ministrat e 27 vendeve anëtare.
“Vendim historik, tani. BE-ja do të ofrojë mbrojtje të përkohshme për ata që i ikin luftës në Ukrainë”, ka thënë ajo përmes një postimi në Twitter.
E ashtuquajtura Direktiva për Mbrojtje të Përkohshme, aplikohet për ukrainasit dhe personat që kanë pasur vendbanim Ukrainën, si dhe për familjarët e tyre që janë zhvendosur nga konflikti.
Personat që nuk kanë shtetësi ukrainase, apo personat që kanë jetuar ilegalisht në Ukrainë, të cilët nuk mund të kthehen në vendin e origjinës, do të përfshihen po ashtu në skemë, ka thënë BE.
Mbrojtja e përkohshme do të zbatohet menjëherë dhe do të zgjasë një vit.
Ajo mund të vazhdohet automatikisht për periudhë gjashtëmujore.
Kombet e Bashkuara kanë thënë më 3 mars se teksa konflikti ka hyrë në ditën e tetë, më shumë se 1 milion njerëz kanë ikur nga Ukraina.
Rreth 600,000 prej tyre kanë kaluar kufirin me Poloninë, vend anëtar i BE-së.
Pamje para nisjes së rundit të dytë të negociatave
Rundi i dytë i takimeve mes Ukrainës dhe Rusisë po zhvillohet në Bjellorusi.
Rusia pretendon se 200 mercenarë nga Kroacia kanë arritur në Ukrainë
Rreth 200 mercenarë nga Kroacia kanë arritur në fushëbetejë në juglindje të Ukrainës, ka thënë të enjten zëdhënësi i Ministrisë ruse të Mbrojtjes, Igor Konashenkov.
“Vetëm javën e kaluar, rreth 200 mercenarë nga Kroacia kanë arritur përmes Polonisë dhe u janë bashkuar batalioneve të nacionalistëve në juglindje të Ukrainës”, ka thënë Konashenkov, sipas agjencisë së lajmeve, TASS.
Konashenkov ka thënë se atasheu ushtarak i Ambasadës kroate në Moskë është ftuar në Ministrinë ruse të Mbrojtjes, ku i është thënë se rusët janë informuar për arritjet e mercenarëve.
