OKB miraton rezolutë kundër pushtimit rus në Ukrainë
Asambleja e Përgjithshme e Kombeve të Bashkuara votoi të mërkurën një rezolutë për të dënuar Rusinë për nisjen e pushtimit të Ukrainës dhe kërkoi që Moska të ndalte luftimet dhe të tërheqë forcat e saj. Ky vendim ka për qëllim izolimin diplomatik të Rusisë në këtë organizatë ndërkombëtare.
Rezoluta, që u mbështet nga 141 anëtarë nga 193 sa janë gjithsej në OKB, i mbylli punimet e një seance urgjente që u thirr nga Këshilli i Sigurimit, teksa forcat ukrainase po luftojnë në portin e Hersonit dhe po përballen me sulme ajrore.
Në rezolutë dënohet “agresioni i Rusisë kundër Ukrainës”. Herën e fundit që Këshilli i Sigurimit i OKB-së kishte thirrur një seancë urgjente të Asamblesë së Përgjithshme ishte në vitin 1982, thuhet në ueb-faqen e OKB-së.
Tridhjetepesë anëtarë, përfshirë Kinën abstenuan, ndërkaq Rusia, Siria, Bjellorusia, Koreja e Veriut dhe Eritrea votuan kundër rezolutës.
Ukraina dhe Rusia do të bisedojnë për armëpushim
Rusia dhe Ukraina do të bisedojnë për një armëpushim gjatë rundit të dytë të bisedimeve që do të mbahet më 3 mars, tha kryenegociatori i Moskës, teksa forcat ruse kanë vazhduar sulmet e tyre kundër qyteteve ukrainase.
Vladimir Medinsky, që është ndihmës i presidentit rus, Vladimir Putin, tha më 2 mars se përveç armëpushimit, do të diskutohet edhe çështjen e korridorit humanitar në Ukrainë.
Presidenca ukrainase ka konfirmuar se delegacioni i saj ishte “nisur” për në vendin ku do të mbahen bisedimet, pasi Medinsky tha se delegacioni ukrainas veçse është nisur nga Kievi.
Bisedimet pritet të mbahen në rajonin Brest në perëndim të Bjellorusisë.
Abramoviq do ta shesë klubin Chelsea
Miliarderi rus, Roman Abramoviq, tha se do ta shesë klubin futbollistik, Chelsea dhe premtoi se do të dhurojë të ardhurat neto për një fondacion bamirësie për “të gjitha viktimat e luftës në Ukrainë”.
“Këtu përfshihen sigurimi i fondeve kritike për nevojat urgjente dhe të menjëhershme për viktimat, si dhe mbështetje të punës afatgjatë të rimëkëmbjes”, tha ai përmes një deklarate.
Abramoviq, që ka mohuar se ka lidhje të ngushta financiare me presidentin rus, Vladimir Putin, apo me Kremlinin, është përballur me presion ditëve të fundit. Ai tha se shitja e klubit nuk do të bëhet me shpejtësi.
Ai po ashtu tha se nuk do të kërkojë shlyerjen e një huaje prej 1.5 miliard funtesh që i ka dhënë klubit.
Ligjvënësit britanikë kanë bërë thirrje që Abramoviq të vendoset në listë sanksionesh për shkak të lidhjeve të tij me shtetin rus.
Tubim pro-Putinit në Podgoricë
Duke brohoritur “Rusia”, “Putin” dhe duke kënduar për Kosovën “e Serbisë”, qindra anëtarë të organizatave ruso-serbe u mblodhën para Parlamentit të Malit të Zi më 2 mars për t’i dhënë mbështetje Rusisë në pushtimin e Ukrainës.
Në këtë tubim morën pjesë anëtarë të grupeve të afërta me Kishën Ortodokse Serbe, lëvizjet çetnike dhe pjesëtarë malazez të grupit të motoçiklistëve “Ujqërit e natës”, organizatë nga Rusia.
Të pranishmit kishin veshur ngjyrat e Rusisë dhe Serbisë dhe në këtë ngjarje u panë edhe flamuj të Perandorisë Ruse si dhe flamuri çetnik me mbishkrimin “Liri ose vdekje”.
Në pano po ashtu shkruhej “serbët në Mal të Zi, rusët në Ukrainë” dhe “Lutuni Zotit, mbështetuni te Rusia”.