Pse është i rëndësishëm Hersoni për Rusinë?
Ministria ruse e Mbrojtjes po pretendon se ka marrë kontrollin e Hersonit.
Ky qytet ka 300,000 banorë.
Nëse këto pretendime vërtetohen, Hersoni do të bëhet qyteti më madh ukrainas në duart e rusëve.
Hersoni është i rëndësishëm për portin që ka në Detin e Zi dhe njihet si qendër industriale.
Kontrollimi i Hersonit nënkupton kontrollimin e një burimi të madh të ujit po ashtu.
Ukraina ka vendosur digë në kanalin e Krimesë Veriore, pasi Rusia ka pushtuar Gadishullin e Krimesë më 2014.
Prej atëherë pjesa më e madhe e ujit të freskët është bllokuar në drejtim të Krimesë, duke shkaktuar probleme me furnizim në rajonin e aneksuar.
Një nga shënjestrat e para të ushtrisë ruse ka qenë zhbllokimi i digës dhe rikthimi i furnizimeve në Krime.
Pajisjet ushtarake ruse kanë hyrë në qendër të Hersonit natën e kaluar.
Kryetari i qytetit, Igor Kolyikhayev, ka thënë të mërkurën se qytetit i duhet një mrekulli.
Ministri britanik: Pushtimi i Ukrainës do të jetë “shumë i vështirë” për Rusinë
Sekretari britanik i Mbrojtjes, Ben Wallace, ka thënë se Rusia përballet me “sfidë të madhe” për të hyrë në qytetet kryesore ukrainase, pasi forcat e armatosura dhe civilët pritet të luftojnë armikun me të gjitha mjetet e mundshme.
Ai ka thënë se është pjesë e doktrinës ushtarake ruse që të rrethojë qendrat urbane të qyteteve dhe të bombardojë “pa bërë dallim” derisa të mbetet një pjesë e vogël e popullsisë nga e cila mund të marrë atë që ka mbetur.
Mirëpo ai ka thënë se madhësia gjeografike e Ukrainës dhe popullsia prej 44 milionë banorëve, do ta bënte pushtimin nga Rusia “shumë të vështirë”.
“Pushtimi i një shteti me forcë dërrmuese është një gjë dhe pushtimi i një populli me 44 milionë banorë që nuk të do, është diçka krejt tjetër”.
Ai ka thënë për transmetuesin britanik, BBC se nuk është në favor që NATO-ja të marrë vendim për ndalim të fluturimeve, duke thënë se çfarëdo shkelje e vendimit prej anës së Rusisë, “mund të çojë në luftë përreth Evropës”.
Ukraina pretendon se ka vrarë 5,840 trupa ruse
Përveç raportimeve se 5,840 trupa ruse janë vrarë, autoritetet ukrainase kanë thënë se janë shkatërruar edhe 30 aeroplanë, 31 helikopterë, mbi 200 tanke, mbi 800 makina të armatosura patrulluese, 85 sisteme të artilerisë, mbi 350 makina dhe 40 pajisje MLRS për lansim të raketave.
Forcat e armatosura ukrainase kanë thënë se të dhënat preliminare përfaqësojnë të gjitha humbjet e forcave ruse prej nisjes së pushtimit.
Radio Evropa e Lirë nuk i ka konfirmuar ato.
Spanja ndihmon Ukrainën me armë
Spanja do të furnizojë Ukrainën me “armë sulmi”, ka thënë të mërkurën kryeministri i këtij shteti, Pedro Sanchez para Parlamentit.
“Dua t’ju njoftoj se Spanja do të ofrojë po ashtu ndihmë ushtarake për rezistencën ukrainase”, ka thënë Sanchez para deputetëve.
Deri më tani Spanja ka ofruar ndihmë vetëm në kuadër të pakos së Bashkimit Evropian, i cili është pajtuar për të ndarë 450 milionë euro për të blerë armë për Ukrainën.
Sanchez ka thënë se vendimi i presidentit rus, Vladimir Putin për të pushtuar Ukrainën është “përpjekje brutale për të ndalur ndërtimin e Evropës mbi baza dhe vlera të kundërta prej asaj që përfaqëson autoritarizmi”.