Rusia pretendon se ka marrë kontrollin e qytetit Herson
Ministria ruse e Mbrojtjes ka thënë se trupat e saj kanë fituar kontrollin e qytetit Herson, i cili gjendet në jug të Ukrainës.
Nëse Herson ka rënë, ai do të bëhet qyteti më i madh në Ukrainë në duart e rusëve.
Përgjatë natës është raportuar se trupat ruse janë parë në rrugët e qytetit dhe kryetari i Hersonit, ka thënë se stacioni i trenit dhe ai i portit janë pushtuar.
Ukraina nis ditën me më shumë shkatërrim
Ukrainasit kanë nisur ditën e mërkurë me zhurmat e sirenave në disa qytete.
Këto janë disa nga zhvillimet e fundit:
- Të paktën 21 persona janë vrarë dhe 112 janë plagosur si pasojë e sulmeve ajrore në qytetin e dytë më të madh të Ukrainës, Harkiv, ka thënë kryetari i qytetit
- Ka raportime për një sulm të ri me raketë në këtë qytet, i cili ka goditur Policinë rajonale dhe një pjesë të Universitetit Karazin
- Parashutistët rusë kanë arritur në Harkiv me qëllim të rrethimit të qytetit, ka thënë ushtria ukrainase
- Forcat ruse janë duke avancuar më shumë në jug të Ukrainës, ka thënë Ministria ruse e Mbrojtjes, duke pretenduar se ka marrë kontrollin e qytetit Herson
- Qasja në lajme dhe transmetime televizive është penguar, pasi dy raketa ruse kanë goditur kullën televizive duke lënë të vdekur pesë persona dhe duke plagosur pesë të tjerë
- Presidenti amerikan, Joe Biden ka mbajtur fjalimin para kombit, duke njoftuar se Shtetet e Bashkuara do të mbyllin hapësirën ajrore për aeroplanët rusë.
- Ai ka përmendur edhe rezistencën e ukrainasve, duke thënë se presidenti rus, Vladimir “Putin mund të rrethojë Kievin me tanke, mirëpo nuk do të fitojë kurrë zemrën e popullit ukrainas”.
Zelensky: Rusia dëshiron “ta zhdukë” Ukrainën
Presidenti ukrainas, Volodymyr Zelensky, ka akuzuar Rusinë të mërkurën se po synon të “zhdukë” ukrainasit, shtetin dhe historinë e tyre.
Në një video-adresim, lideri ukrainas ka thënë se sulmet me raketa në një zonë të masakrës së Holokaustit tregon se “për shumë njerëz në Rusi, Kievi ynë është plotësisht i huaj”.
“Ata nuk dinë asgjë për kryeqytetin tonë. Për historinë tonë. Mirëpo ata kanë urdhër për të zhdukur historinë tonë. Për të zhdukur shtetin tonë. Për të na zhdukur të gjithë neve”.
Raportime të përziera nga Hersoni
Moska ka thënë pak më parë se ka fituar plotësisht kontrollin e qytetit Herson.
Mirëpo autoritetet rajonale ukrainase kanë thënë se Herson është i rrethuar plotësisht nga forcat ruse, duke rënë në kundërshtim me pretendimin.
“Ne ende jemi Ukrainë. Ende të fortë”, ka thënë kryetari i qytetit.