Angazhimet e SHBA-së për Ukrainën:
- Ka miratuar dërgesa armësh në vlerë prej 350 milionë dollarësh.
- Ka ndarë furnizime, në vlerë prej 54 milionë dollarësh, si ndihmë humanitare.
- Ka hequr banka të zgjedhura ruse nga sistemi global bankar SWIFT.
- Ka kufizuar Bankën Qendrore Ruse në mbrojtjen e rublës.
- I është bashkuar një force trans-atlantike për ngrirjen dhe konfiskimin e pasurisë së oligarkëve rusë.
- Ka mbyllur hapësirën ajrore për avionët rusë.
- Shtëpia e Bardhë i ka kërkuar Kongresit amerikan 6.4 miliardë dollarë shtesë, si ndihmë urgjente për Ukrainën gjatë muajve të ardhshëm.
Atletët rusë dhe bjellorusë bllokohen nga Unioni i Patinazhit
Atletët nga Rusia dhe Bjellorusia, e cila akuzohet për mbështetjen e pushtimit rus të Ukrainës, nuk do të lejohen të konkurrojnë në garat ndërkombëtare të patinazhit deri në njoftimin e radhës, bëri të ditur Unioni Ndërkombëtar i Patinazhit (ISU).
ISU është federata e fundit sportive që i ndalon sportistët e dy vendeve të marrin pjesë në ngjarjet sportive globale.
ISU tha se shpreh solidaritetin me të gjithë ata që janë prekur nga konflikti në Ukrainë.
Kampionati botëror i patinazhit do të zhvillohet pas tri javësh.
Në Lojërat Olimpike Dimërore të Pekinit 2022, që përfunduan muajin e kaluar, Rusia fitoi pesë medalje në patinazh.
Wikipedia kërcënohet me bllokim
Wikipedia, që është një enciklopedi online dhe pa pagesë, tha se është paralajmëruar nga mbikëqyrësi rus i mediave, Roskomnadzor, se do të bllokohet nëse nuk e heq një artikull me titull “Pushtimi rus i Ukrainës 2022”.
Autoritetet ruse dhe mediat e kontrolluara nga shteti nuk i referohen luftës në Ukrainë si “luftë” apo “pushtim”, por si “operacion ushtarak”.
Roskomnadzor i ka urdhëruar mediat qysh më 26 shkurt që t’i fshijnë raportet që përdorin fjalët: “sulm”, “pushtim” ose “shpallje lufte”, për të përshkruar inkursionin e paprovokuar ushtarak të Rusisë në Ukrainën fqinje.
Nuk është ende e qartë se si do të veprojë Wikipedia.
