Irani: Ukraina është viktimë e krizave të shkaktuara nga SHBA
Lideri suprem i Iranit, Ayatollah Ali Khamenei, ka thënë të martën se Ukraina “është viktimë e krizave të shkaktuara nga Shtetet e Bashkuara”.
Autoriteti politik i Iranit ka thënë se po ashtu se ky shtet mbështet dhënien fund të luftës në Ukrainë, mirëpo ka shtuar se duhet të pranohen rrënjët e konfliktit.
Khamenei, i cili ka mbajtur një fjalim televiziv, ka thënë se kriza në Ukrainë ka treguar se “Shteteve të Bashkuara nuk duhet besuar.
Franca: Sanksionet do ta shkatërrojnë ekonominë ruse
Franca ka thënë të martën se sanksionet e Perëndimit kundër Moskës, pas pushtimit në Ukrainë, do të shkatërrojnë ekonominë ruse.
“Ne do ta shkatërrojmë ekonominë ruse”, ka thënë ministri i Financave, Bruno Le Maire për transmetuesin Franceinfo një ditë pasi Franca, Bashkimi Evropian dhe vende tjera kanë thënë se do të vendosin një rund të ri të sanksioneve ndaj Rusisë.
Balanca e fuqisë së sanksioneve pas luftës në Ukrainë “është totalisht” në favor të Bashkimit Evropian, i cili “është në proces të zbulimit të fuqisë së vet ekonomike”, ka thënë ai.
Të hënën, BE-ja ka shtuar oligarkë të lidhur me Kremlinin në listën e sanksioneve.
Një këshilltar i presidentit francez, Emmanuel Macron u ka thënë gazetarëve se vendosja e sanksioneve të reja, të cilat synojnë të “rrisin koston” e luftës së Putinit, është “prioritet”.
Lukashenka: Bjellorusia nuk do t’i bashkohet pushtimit
Lideri bjellorus, Alexander Lukashenka, u ka thënë mediave shtetërore se forcat e këtij shteti nuk do t’iu bashkohen trupave ruse në pushtimin në Ukrainë.
Lukashenka, i cili është aleat i ngushtë i presidentit rus, Vladimir Putin, ka thënë se “ushtria bjelloruse nuk është duke marrë pjesë dhe as nuk ka marrë pjesë në aksion ushtarak”.
“Mund t’ia vërtetojmë këtë secilit. Për më shumë, udhëheqësia ruse nuk e ka ngritur kurrë këtë çështje me ne – përfshirjen tonë në konfliktin e armatosur. Ne nuk synojmë të marrim pjesë në këtë operacion special në Ukrainë në të ardhmen. Nuk ka nevojë”.
Shqetësimet janë rritur të hënën se Lukashenka është duke u përgatitur për të dërguar forcën ushtarake për t’iu bashkuar sulmit në Kiev.
Zëdhënësi i Departamentit amerikan të Shtetit, Ned Price, ka thënë të hënën se Rusia është “tallur” me sovranitetin e Bjellorusisë duke nisur pushtimin e Ukrainës nga territori bjellorus.
Raketat ruse godasin qendrën e Harkivit
Ministri i Jashtëm ukrainas, Dmytro Kuleba, ka publikuar një video në Twitter, që sipas tij shfaq momentin kur në Harkiv është sulmuar Sheshi Liria.
Ai ka akuzuar presidentin rus, Vladimir Putin për krime lufte dhe ka bërë thirrje që bota ta izolojë Rusinë.