Pajisjet për internetin satelitor zbarkojnë në Ukrainë
Pajisjet për shërbimin satelitor të internetit të Elon Musk, Starlink, kanë mbërritur në Ukrainë pasi një nga ministrat e saj i bëri thirrje personalisht miliarderit që t’i ndihmojë përballë pushtimit rus.
Pajisjet mund të ndihmojnë në ofrimin e internetit në zonat ku qasja në internet është goditur për shkak të sulmit të urdhëruar nga Presidenti Vladimir Putin ndaj shtetit fqinj, më 24 shkurt.
Grupi i monitorimit të internetit botëror ,NetBlocks, ka raportuar një sërë ndërprerjesh të rëndësishme në shërbimin e internetit në Ukrainë pas fillimit të pushtimit rus.
Ministri ukrainas: SHBA ka premtuar më shumë ndihmë për t'i rezistuar Rusisë
Ministri i Jashtëm ukrainas, Dmytro Kuleba, tha më 1 mars se Sekretari i Shtetit i Shteteve të Bashkuara të Amerikës, Antony Blinken, i kishte ofruar vendit të tij, i cili është nën sulm nga Rusia, më shumë mbështetje në formën e sanksioneve dhe armëve.
"Unë theksova se Ukraina dëshiron paqen, por për sa kohë që ne jemi nën sulmin e Rusisë, ne kemi nevojë për më shumë sanksione dhe armë. Sekretari më siguroi për të dyja. Ne koordinuam hapat e mëtejshëm", tha ai.
Lufta në Ukrainë hyn në ditën e gjashtë.
Me bombardime e viktima, lufta në Ukrainë ka hyrë në ditën e gjashtë që kur filloi më 24 shkurt.
Zhvillimet kryesore të orëve të fundit kanë qenë këto:
- Sirenat janë dëgjuar sërish në Kiev dhe banorët janë strehuar në ambiente nëntokësore si garazhe apo metro, pas raportimeve për sulme të reja ruse në afërsi të kryeqytetit ukrainas
- Dymbëdhjetë anëtarë të misionit diplomatik rus në Kombet e Bashkuara kanë marrë kërkesë për t’u larguar nga Shtetet e Bashkuara deri më 7 mars, për shkak të përfshirjes në aktivitete jodiplomatike.
- Bashkimi Evropian ka prezantuar sanksione të reja kundër figurave dhe kompanive më të fuqishme të Rusisë.
- Presidenti ukrainas, Volodymyr Zelenskyi, kërkoi një ndalim global të avionëve dhe anijeve ruse si ndëshkim për sulmin ndaj vendit të tij.
- Meta, kompania amë e Facebook-ut, ka thënë se do të kufizojë qasjen në mediat shtetërore ruse, RT dhe Sputnik në platformën e saj përreth Bashkimit Evropian.
- Pajisjet për shërbimin satelitor të internetit të Elon Musk, Starlink, kanë mbërritur në Ukrainë pasi një nga ministrat e saj i bëri thirrje personalisht miliarderit që t’i ndihmojë përballë pushtimit rus.
- Ministri i Jashtëm ukrainas, Dmytro Kuleba, tha se Sekretari i Shtetit i Shteteve të Bashkuara të Amerikës, Antony Blinken, i ka ofruar vendit të tij më shumë mbështetje në formën e sanksioneve dhe armëve.
Vazhdojnë sulmet në Harkiv dhe Kiev të Ukrainës
Sulmet ruse në qytetin Harkiv të Ukrainës dhe kryeqytetin Kiev vazhduan gjatë natës së 28 shkurtit dhe mëngjesit të 1 marsit.
Në Harkiv, ushtria ruse ka hedhur në erë nënstacione, tha kryebashkiaku i qytetit, Ihor Terekhov.
Sulmet thuhet se po shkaktonin probleme me furnizimin me energji elektrike dhe ujë.
