Moska paralajmëron kundër furnizimit të Ukrainës me armë vdekjeprurëse
Ministria e Jashtme ruse ka thënë të hënën se ata që furnizojnë Ukrainën me armë vdekjeprurëse do të mbajnë përgjegjësi nëse ato përdoren gjatë fushatës ushtarake ruse.
Kjo Ministri ka thënë se hapat që ka marrë Bashkimi Evropian kundër Rusisë nuk do të mbesin pa përgjigje të ashpër.
Pentagoni po studion urdhrin bërthamor të Putinit
Zyrtarët amerikanë kanë thënë të hënën se urdhri i presidentit rus, Vladimir Putin për të mobilizuar forcat bërthamore është i “rrezikshëm”, mirëpo nuk kanë parë ndonjë ndryshim në strategjinë e kërcënimit të këtij shteti.
Zyrtarët kanë thënë se trupat ruse në Ukrainë vazhdojnë të lëvizin ngadalë, të penguar nga mungesa e furnizimeve me naftë.
Të dielën, katër ditë pas nisjes së sulmit rus, Putin ka njoftuar se ka urdhëruar shefat ushtarakë “të vendosin në gatishmëri të lartë forcat parandaluese”.
Zyrtarë të Departamentit amerikan të Shtetit dhe Departamentit amerikan të Mbrojtjes, kanë thënë se janë duke tentuar të kuptojnë se çfarë veprime janë marrë pas urdhrit.
“Ne mendojmë se retorika provokative sa i përket armëve bërthamore, është e rrezikshme, shton rrezikun e kalkulimeve të gabuara dhe duhet të shmanget”, ka thënë një zëdhënës i Departamentit amerikan të Shtetit.
“Rusia dhe Shtetet e Bashkuara janë pajtuar se përdorimi i armëve bërthamore do të kishte pasoja shkatërruese dhe kanë theksuar disa herë, përfshirë këtë vit, që lufta bërthamore nuk mund të fitohet andaj nuk duhet të luftohet kurrë”, ka thënë ky zëdhënës.
Biden konsultohet me Scholz dhe aleatë tjerë
Pas sulmit të Rusisë në Ukrainë, presidenti amerikan, Joe Biden është konsultuar me kancelarin gjerman, Olaf Scholz, presidentin francez, Emmanuel Macron, kryeministrin britanik, Boris Johnson dhe aleatë tjerë të hënën.
Përveç Bidenit, Scholzit, Macronit dhe Johnsonit, në mesin e pjesëmarrësve kanë qenë kryeministri italian, Mario Draghi, kryeministri japonez, Fumio Kishida, presidenti polak, Andrzej Duda, presidenti rumun, Klaus Johannis dhe kryeministri kanadez, Justin Trudeau.
Presidentja e Komisionit Evropian, Ursula von der Leyen, presidenti i Këshillit Evropian, Charles Michel dhe Sekretari i Përgjithshëm i NATO-s, Jens Stoltenberg kanë qenë po ashtu në takimin virtual.
Shtëpia e Bardhë ka thënë se qëllimi i takimit ka qenë diskutimi i zhvillimeve të fundit sa i përket sulmit rus në Ukrainë dhe koordinimi i përgjigjes së përbashkët.
Gjykata Ndërkombëtare Penale do të hetojë sulmin rus
Gjykata Ndërkombëtare Penale do të nisë hetimet nën dyshimet për krime lufte të kryera nga Rusia në Ukrainë.
“Ka bazë të besueshme për të besuar se në Ukrainë janë kryer krimet e supozuara të luftës dhe krimet kundër njerëzimit”, ka thënë Karim AA Khan, prokuror në këtë Gjykatë.
“Qëllimi im është që ky hetim të përfshijë gjithashtu çdo krim të ri të supozuar që bie në juridiksionin e zyrës sime që është kryer nga ndonjë palë e konfliktit në çfarëdo pjese të Ukrainës”.