Sërish raketa e sirena në Kiev
Ka shenja për sulme të reja në Kiev, pasi sirenat ajrore janë dëgjuar të hënën dhe banorët janë strehuar në ambiente nëntokësore.
Transmetuesi britanik, BBC, ka thënë se përleshjet po afrohen afër zemrës së kryeqytetit ukrainas.
Si e dëmton Rusinë përjashtimi nga sistemi SWIFT?
Shtetet perëndimore kanë thënë se Rusia do të përjashtohet nga sistemi SWIFT. Dëmet është thënë se do të jenë të mëdha. Por çfarë është SWIFT dhe kë e dëmton më së shumti?
Ukraina u ofron amnisti dhe para ushtarëve rusë që ulin armët
Ministri ukrainas i Mbrojtjes, Oleksii Reznikov, u ka thënë ushtarëve rusë se nëse ulin armët, për ta do të ketë amnisti të plotë dhe kompensim ushtarak.
“Ju që nuk dëshironi të bëheni vrasës dhe të vdisni, mund të ruani veten”, ka thënë ai përmes një postimi në rrjetet sociale, transmeton agjencia e lajmeve, Reuters.
Erdogan "nuk i kthen shpinën" as Ukrainës, as Rusisë
Presidenti turk, Recep Tayyip Erdogan, ka thënë sulmi rus në Ukrainë “është i papranueshëm”, mirëpo shteti i tij nuk do t’i kthejë shpinën asnjërit shtet, pasi me të dyja vendet ka lidhje të forta.
Duke folur pas një takimi të kabinetit më 28 shkurt, Erdogan ka thënë se Turqia, vend anëtar i NATO-s, do të respektojë angazhimet që ka ndaj Aleancës, ndonëse nuk do të shpërfillë “interesat rajonale” në rajon.
Ai ka shtuar se Turqia, e cila ndan kufirin detar me Ukrainën dhe Rusinë dhe ka lidhje të mira me të dyja shtetet, do të zbatojë paktin ndërkombëtar detar për të parandaluar përshkallëzimin e luftës.
Sipas Konventës së vitit 1936, Turqia ka të drejtë t’ua ndalojë anijeve luftarake përdorimin e Dardaneleve dhe Bosforit gjatë luftës.
Ukraina i ka kërkuar Ankarasë që të zbatojë Traktin dhe t’ua bllokojë qasjen anijeve luftarake ruse.
Ankaraja ka lidhje të ngushta me Rusinë në sektorët e energjisë dhe mbrojtjes, mirëpo Ukrainës i ka shitur dronë dhe ka nënshkruar marrëveshje për bashkëprodhim.