Masat e mundshme nga SHBA-ja dhe BE-ja
Kosova mund të përballet me një varg masash të tjera nga Shtetet e Bashkuara të Amerikës dhe Bashkimi Evropian, nëse nuk angazhohet në mënyrë konstruktive për shtensionimin e situatës në veri të vendit, paralajmërojnë ish-diplomatë dhe përfaqësues të shoqërisë civile.
Për tensionet në veri, përkatësisht mospërfilljen e këshillave të SHBA-së në lidhje me hapat e nevojshëm atje, Kosova është përjashtuar tashmë nga një stërvitje e madhe ushtarake, e udhëhequr nga SHBA-ja në Evropë.
Artikullin e plotë mund ta lexoni KËTU
Begaj i bën thirrje Kosovës të koordinohet me partnerët strategjikë
Presidenti i Shqipërisë, Bajram Begaj, u bëri thirrje autoriteteve në Kosovë që të tregojnë maturi dhe të koordinohen me partnerët ndërkombëtarë për t’i dhënë zgjidhje krizës në veri të shtetit.
Ai tha se është në komunikim të vazhdueshëm me autoritetet kosovare.
“Jam në komunikim të vazhdueshëm me autoritetet më të larta të Kosovës, po ashtu me komandantin e KFOR-it [gjeneralmajor Angelo Michele Ristuccia]dhe me disa presidentë të rajonit. Unë kam bërë një thirrje vëllazërore për autoritetet e Kosovës që në këtë situatë duhet të kenë durim, maturi dhe duhet të dëgjojnë dhe të koordinohen me partnerët tanë strategjikë. Dhuna nuk është zgjidhja, konflikti i dhunshëm nuk duhet të jetë asnjëherë opsion, i vetmi opsion për zgjidhje është dialogu”, tha Begaj.
Vuçiq paralajmëron bisedime me serbët e Kosovës
Presidenti i Serbisë, Aleksandar Vuçiq, tha se nga 9 deri më 12 qershor do të zhvillojë bisedime me serbët e Kosovës, teksa tensionet në veri të Kosovës po vazhdojnë.
Gjatë një adresimi në Beograd, Vuçiq falënderoi serbët në Kosovë që, sipas tij, në mënyrë paqësore, po luftojnë për të drejtat e tyre.
I dërguari i Uashingtonit për Ballkanin Perëndimor, Gabriel Escobar, më herët gjatë 7 qershorit, tha se në takimin me presidentin serb, ky i fundit e ka siguruar atë se do ta shfrytëzonte ndikimin e tij për ta bindur komunitetin serb në veri të Kosovës që të merrte pjesë në zgjedhjet eventuale.
Ligjvënësit amerikanë i bëjnë thirrje Kosovës dhe Serbisë të ulin tensionet
Një grup senatorësh amerikanë u kanë bërë thirrje Kosovës dhe Serbisë që të ulin tensionet.
Kryetarja e Nënkomitetit të Senatit për Punë të Jashtme, Jeanne Shaheen, senatorët Chris Murphy, Van Hollen, Ben Cardin, Thom Tillis dhe Pete Ricketts, përmes një deklarate të përbashkët thanë se janë “thellësisht të shqetësuar” nga situata fragjile e sigurisë në veri të Kosovës.
“Ne përsërisim mbështetjen e fuqishme të Senatit amerikan për përpjekjet e BE-së, në koordinim të ngushtë me SHBA-në, për të ndërmjetësuar rrugën përpara. Por, që një zgjidhje të jetë e qëndrueshme, si kryeministri i Kosovës, Albin Kurti, ashtu edhe presidenti i Serbisë, Aleksandar Vuçiq, duhet menjëherë të dëgjojnë thirrje e ndërkombëtarëve për të shtenisonuar situatën, për të rikthyer besimin në institucionet lokale në veri dhe të ripërkushtohen për zbatimin e Marrëveshjes drejt normalizimit të raporteve, duke themeluar Asociacionin e komunave me shumicë serbe në Kosovë”, u tha në deklaratën e senatorëve.
Ligjvënësit amerikanë po ashtu u bënë thirrje liderëve në Kosovë dhe Serbi që të zgjedhin paqen, prosperitetin dhe sigurinë e qytetarëve të tyre.
“Dështimi për të shtensionuar situatën do të nxiste pasoja nga Perëndimi, që ka punuar me zell për të mbështetur Kosovën dhe Serbinë në rrugën përpara dhe pa nevojë rrezikon të dobësojë raportet tona dypalëshe. Kjo nuk është në interesin e askujt. Ne i bëjmë thirrje Kosovës dhe Serbisë të punojnë në mirëbesim me BE-në dhe SHBA-në që të gjendet një rrugë përpara pa vonesa”, u tha në deklaratën e përbashkët të ligjvënësve amerikanë.