Dështimi i 52-të për konstituimin e Kuvendit të Kosovës ka nxitur reagime të ashpra nga përfaqësuesit diplomatikë të Bashkimit Evropian, Gjermanisë dhe Britanisë së Madhe në Prishtinë, të cilët e cilësuan këtë situatë si të papranueshme dhe zhgënjyese për qytetarët.
Ambasadori i BE-së në Kosovë, Aivo Orav, tha pas përfundimit të seancës të premten se “Kosovës i duhet një Kuvend pak a shumë menjëherë” dhe theksoi nevojën për një qeveri të re që do t'i forconte marrëdhëniet me Brukselin.
“Një qeveri e re që do ta ndërtojë një urë të re dhe të fortë mes Kosovës dhe BE-së”, deklaroi Orav pas seancës së mbajtur të premten.
Ngjashëm u shpreh edhe ambasadori gjerman, Jorn Rohde, i cili vlerësoi se klasa politike po dështon përballë qytetarëve.
“Qytetarët dolën për të votuar më 9 shkurt dhe tani janë bërë gati gjashtë muaj. Është fatkeqësi që Kuvendi nuk po konstituohet", tha ai.
Ambasadori gjerman, Jorn Rohde.
Rohde komentoi edhe vendimin e Gjykatës Kushtetuese, e cila një ditë më parë vendosi masë të përkohshme duke ndaluar çdo veprim të deputetëve për konstituimin e Kuvendit nga data 27 korrik deri më 8 gusht.
Sipas saj, nëse nuk do të vendosej kjo masë, çdo vendim i ndërmarrë pas 26 korrikut e deri në vendimmarrjen e Gjykatës, lidhur me kërkesat që i janë parashtruar, "mund të shkaktojë dëme të pariparueshme për rendin kushtetues”.
“Ky është një karton i kuq për klasën politike”, tha Rohde, duke theksuar urgjencën për formimin e institucioneve.
SHIKONI EDHE: Kushtetuesja ndalon mbajtjen e seancës konstituive të Kuvendit pas afatit 30-ditorAmbasadori britanik në Kosovë, Jonathan Hargreaves, u ka bërë thirrje politikanëve të Kosovës që të bashkohen dhe të gjejnë një zgjidhje për t’i dhënë fund bllokadës, para se të nisë zbatimi i masës së përkohshme të Gjykatës Kushteutese.
“Përndryshe, Kosova po hyn në territor të panjohur dhe shtetasit e saj vazhdojnë të humbin përfaqësimin politik kuptimplotë dhe aftësinë për të marrë vendime të rëndësishme vendase dhe ndërkombëtare që ndikojnë në jetën e qytetarëve”, ka thënë ambasadori përmes një postimi në Facebook.
Ambasadori britanik në Kosovë, Jonathan Hargreaves.
Përfaqësuesit ndërkombëtarë nga Shtetet e Bashkuara, BE-ja, Gjermania, Britania e Madhe dhe Franca ishin të pranishëm në seancën e së premtes, e cila dështoi një ditë para përfundimit të afatit 30-ditor të përcaktuar nga Kushtetuesja për konstituimin e Kuvendit.
Megjithëse Lëvizjes Vetëvendosje i takon pozita e kryeparlamentarit, partitë tjera ose kundërshtojnë emrin e propozuar, atë të Albulena Haxhiut, ose ndryshimin e mënyrës së votimit për të – nga i hapur në të fshehtë.
Meqë kanë mbetur më pak se 48 orë para se të fuqizohet masa e përkohshme e Kushtetueses, kryesuesi i seancës Avni Dehari, e ka thirrur seancën e radhës, të 53-ën me radhë, për nesër, të shtunën, në orën 14:00.
Deputetët duhet ta zgjedhin kryetarin dhe pesë nënkryetarët për ta konstituuar përfundimisht Kuvendin e ri.
Vetëm pas konstituimit të Kuvendit mund të formohet Qeveria e re.