Janë bërë një vit që prej se Qeveria e Kosovës ka vendosur taksën doganore prej 100 për qind ndaj importeve nga Serbia dhe Bosnjë e Hercegovina. Kjo masë ka bërë që këto dy shtete të humbin pothuajse në tërësi tregun në Kosovë, treg ky që tashmë po mbushet me importet e mallrave nga vendet tjera të rajonit dhe ato të Bashkimit Evropian. Megjithatë, edhe pas taksës në Kosovë mund të gjenden produkte nga Serbia dhe Bosnjë e Hercegovina, por kryesisht në viset e banuara me shumicë serbe. Përveç aspektit ekonomik, kjo taksë është vlerësuar se ka pasur edhe efekte politike. Heqja e taksës është vënë si kusht nga Beogradi zyrtar që të kthehet në tavolinën e dialogut të lehtësuar nga Bashkimi Evropian për normalizimin e marrëdhënieve. Pezullimin e kësaj mase e kanë kërkuar edhe Shtetet e Bashkuara të Amerikës.
Masa që ndryshoi tregun në Kosovë
5
Megjithëse taksa ka pamundësuar që sasi të mëdha të produkteve të hyjnë në tregun e Kosovës, produkte të Serbisë dhe Bosnjë e Hercegovinës, mund të gjenden në dyqanet në komunat në veri të vendit.
6
Produkte të Serbisë gjenden edhe në Graçanicë, që gjendet rreth 10 kilometra në lindje të Prishtinës. Autoritetet në Kosovë kanë deklaruar se kanë shtuar masat për të parandaluar kontrabandën e mallrave, kryesisht në pjesën veriore të vendit. Drejtori i Doganës së Kosovës, Bahri Berisha, thotë se ka tentime që të futen mallra në Kosovë nga pjesa malore në veri të vendit, por sipas tij, këto mallra janë në sasi të vogël.
7
Vendosja e taksës prej 10 dhe më pas në 100 për qind, zemëroi Beogradin zyrtar. Presidenti serb, Aleksandar Vuçiq ka thënë se do të kthehet në dialogun për normalizimin e marrëdhënieve reciproke– që ndërmjetësohet nga Brukseli – vetëm kur Prishtina zyrtare të heqë taksën.
8
Lëvizja Vetëvendosje – fituesja e zgjedhjeve parlamentare të 6 tetorit – dhe Lidhja Demokratike e Kosovës, parti këto që po mëtojnë të formojnë koalicionin e ardhshëm qeverisës kanë paralajmëruar mundësinë që taksa të zëvendësohet me masën e reciprocitetit të plotë. Kjo gjë është kundërshtuar nga kryeministri në detyrë i Kosovës, Ramush Haradinaj, i cili ka insistuar se taksa duhet të hiqet në këmbim të njohjes së Kosovës nga Serbia.
