Ukraina: 34 civilë të vrarë në rajonin e Harkivit
Sulmet e Rusisë në popullatën civile vranë 34 civilë në rajonin lindor të Ukrainës, në Harkiv në mes të datave 2 dhe 3 mars.
Kështu thanë shërbimet e emergjencës të enjten, më 3 mars.
Përveç kësaj, lideri i rajonit lindor të Donjeckut tha se qyteti port i Mariupolit, një nga objektivat e para të pushtimit rus, ka mbetur pa furnizim me ujë dhe energji elektrike.
Franca u kërkon qytetarëve të saj të largohen nga Rusia
Franca u bëri thirrje qytetarëve të saj të enjten që të largohen nga Rusia nëse prania e tyre atje "nuk është thelbësore", pas pushtimit të Ukrainës nga Moska dhe mbylljes së hapësirës ajrore midis Rusisë dhe Bashkimit Evropian.
“Në kontekstin e pushtimit të Ukrainës nga Rusia dhe pas vendosjes së sanksioneve ndërkombëtare, ne duhet të rrisim vigjilencën tonë”, shkroi Ministria e Jashtme në faqen e saj të internetit.
Kina: Më shumë se 3,000 qytetarë kinezë janë larguar nga Ukraina
Më shumë se 3,000 shtetas kinezë në Ukrainë janë zhvendosur në mënyrë të sigurt në vendet fqinje, tha një zëdhënës i Ministrisë së Jashtme në një konferencë për media të enjten.
Ndryshe nga shumë vende, Kina nuk u tha afërsisht 6,000 qytetarëve të saj në Ukrainë që të largoheshin para nisjes së sulmit rus në Ukrainë, më 24 shkurt.
Më vonë, shumë qytetarë kinezë u evakuuan në rrugë tokësore.
Kuvendi i Kosovës solidarizohet me Ukrainën
Kuvendi i Kosovës ka mbajtur një minutë heshtje për viktimat pas sulmit të Rusisë ndaj Ukrainës
Salla e Kuvendit të Kosovës, të enjten, u mbush me pankarta, në të cilat shkruan "Qëndrojmë me Ukrainën".
Në mbledhjen e Kuvendit të enjten u votua edhe një rezolutë në mbështetje të Ukrainës.
