Gjermania regjistron mbi 5,300 refugjatë nga Ukraina
Një total prej 5,309 personave kanë hyrë në Gjermani nga Ukraina, sipas Policisë Federale gjermane.
“Por siç e dini, nuk ka kontrolle kufitare, të paktën jo kontrolle të rregullta, vetëm rastësore. Prandaj ka mundësi që më shumë njerëz kanë hyrë tashmë në Gjermani”, ka thënë një zyrtar i Ministrisë së Brendshme të Gjermanisë.
Rusia shprehet e gatshme për të negociuar me Ukrainën
Rusia ka thënë se është e gatshme për të negociuar me Ukrainën më 2 mars.
“Këtë pasdite, pasdite vonë, delegacioni ynë do të jetë duke pritur për negociatorët ukrainas”, ka thënë zëdhënësi i Kremlinit, Dmitry Peskov, sipas agjencisë së lajmeve, Interfax.
“Delegacioni ynë do të jetë i gatshtëm të vazhdojë bisedimet këtë mbrëmje”.
Peskov nuk ka përmendur vendin e takimit.
“Nuk dua ta bëj këtë paraprakisht”.
Pas rundit të parë të negociatave të hënën, të dyja palët kanë përmendur kufirin bjelloruso-polak si vend për negociata.
Delegacioni rus do të drejtohet sërish nga ish-ministri i Kulturës, Vladimir Medinsky.
Rundi i parë i takimeve ka përfunduar pa arritur pajtueshmëri.
Peskov e ka bërë të qartë se Rusia insiston në kërkesat e presidentit rus, Vladimir Putin.
Në mesin e tyre janë edhe kërkesat që Qeveria në Kiev të njohë “republikat popullore” të Donjeckut dhe Luhanskut, si dhe sovranitetin e Rusisë në Gadishullin e Krimesë.
Rusia kërkon edhe “çmilitarizimin” e Ukrainës.
Kryetari i Kievit: Është koha të përgatitemi për rezistencë
Kryetari i Kievit, Vitaliy Klitschko, është duke paralajmëruar banorët e kryeqytetit se forcat ruse janë duke lëvizur drejt qytetit dhe u ka bërë thirrje njerëzve të qëndrojnë brenda dhe të përgatiten për të mbrojtur qytetin.
“Armiku po mbledh forcat afër e më afër”, ka thënë Klitschko, duke shtuar se ka luftime në afërsi të Kievit.
“Ne jemi të përgatitur dhe do ta mbrojmë Kievin. U bëj thirrje banorëve të Kievit që të mos humbin guximin”.
Deri më tani, Kievi u ka rezistuar përpjekjeve për pushtim rus.
Një konvoj i armatosur – 65 kilometra i gjatë – është duke iu afruar qytetit nga veriu.
Analistët besojnë se konvoji mund të shërbejë si ndihmë për një tentim pushtimi nga perëndimi.
Rusët duhet të garojnë si neutralë në Lojërat Paralimpike
Atletët paralimpikë nga Rusia dhe Bjellorusia duhet të garojnë si neutralë në Lojërat Paralimpike Dimërore, që do të mbahen në Pekin.
Në një deklaratë të Komitetit Ndërkombëtar Paralimpik, është thënë se atletët – që tashmë kanë arritur në Kinë – do të garojnë me flamurin paralimpik.
Ata nuk do të përfshihen në tabelën e medaljeve”, ka thënë Komiteti.
Në deklaratë është thënë se Komiteti ka marrë “veprimet më të ashpra” brenda parametrave që i lejohet.
Lojërat Paralimpike hapen të premten, ndërsa garat nisin të shtunën.
Ekipi paralimpik i Ukrainës ka arritur në Pekin dhe do të garojë më pak se një javë pasi presidenti rus, Vladimir Putin ka marrë vendim për të pushtuar Ukrainën.
Në ditët e fundit, një mori institucionesh sportive kanë marrë masa për të përjashtuar atletët rusë nga garat, ndalimin e përdorimit të flamurit rus, apo edhe anulimin e garave në Rusi.