Vit i vështirë në luftën kundër pandemisë së koronavirusit. Dy qeveri të rrëzuara brenda vitit. Një president i dorëhequr, si dhe arrestime të figurave kryesore të Ushtrisë Çlirimtare të Kosovës janë ndër ngjarjet kryesore që karakterizuan Kosovën gjatë vitit 2020.
Krizë mbi krizë
1
2 shkurt 2020 - Pas katër muajsh përpjekjeje, Lëvizja Vetëvendosje dhe Lidhja Demokratike e Kosovës u pajtuan për koalicion të bashkëqeverisjes.
2
3 shkurt 2020 - Me 66 vota për, asnjë kundër dhe dhjetë abstenime, deputetët e Kuvendit të Kosovës votuan për formimin e qeverisë së re.
3
11 mars 2020 - Rritja e numrit të rasteve me COVID-19 në vendet e rajonit, bëri që Qeveria e Kosovës t’i mbyllë të gjitha shkollat në nivel vendi deri më 27 mars. Pak kohë më vonë filloi mësimi në distancë.
4
13 mars 2020 - Në Kosovë u regjistruan rastet e para me koronavirus. Qeveria filloi masat parandaluese duke vendosur disa fshatra e komuna të tëra në karantinë. Rritja e numrit të të infektuarve me koronavirus, shtyu qeverinë që ta fusë Kosovën në izolim total për gati tre muaj.
