Departamenti amerikan i Thesarit, ka vënë sanksione të reja kundër Rusisë, përkatësisht ndaj 24 personave dhe 14 subjekteve, duke përfshirë disa zyrtarë të lartë që besohet të kenë lidhje të ngushta me presidentin rus, Vladimir Putin.
Në emrat e bërë publikë sot përfshihet manjati, Oleg Deripaska, udhëheqësi i gjigantit rus, Gazprom, Aleksei Miller, ish-truproja e Putinit, Viktor Zolotov, sekretari i Putinit në Këshillin e Sigurisë, Nikolai Patrushev.
Këta janë disa nga zyrtarët dhe manjatët më të njohur rusë që shënjestrohen nga SHBA-ja, si ndëshkim për veprimet e Moskës, përfshirë ndërhyrjen e saj të dyshuar në zgjedhjet presidenciale të SHBA-së më 2016.
Në mesin e shumë personave të tjerë janë edhe ish-kryeministri dhe shefi i inteligjencës së Jashtme, Mikhail Fradkov, ministri i Brendshëm rus, Vladimir Kolokoltsev dhe manjati, Viktor Vekselberg.
