Me punëdore, të mbijetuarat e dhunës në familje rinisin jetën në strehimore

Në Qendrën për Mbrojtjen e Grave dhe Fëmijëve në Prishtinë, disa gra që i mbijetuan dhunës në familje qëndisin modele të ndryshme në pëlhurë.

Me gjilpërë në dorë e penj shumëngjyrësh, ato mësojnë se si të zbukurojnë pëlhurën e vendosur në kornizat për qëndisje.

Edhe nëpër strehimoret e tjera të Kosovës, të mbijetuarat e dhunës në familje mësojnë se si të bëjnë punëdore.

Kjo bëhet me qëllimin që ato të marrin një zanat që mund t'u shërbejë në të ardhmen për pavarësim financiar. Në këto qendra mbahen edhe kurse të tjera të shumta me të njëjtin qëllim.

Modelet e qëndisura nuk janë të vetmet krijime të tyre. Atje, ato kanë mundësinë edhe të krijojnë buqeta me lula.

Në Kosovë, vetëm deri në tetor të këtij viti, janë raportuar gati 2.500 raste të dhunës në familje. Shumica e viktimave janë gra.

Numri më i madh i rasteve u raportua vitin e kaluar, kur Policia e Kosovës raportoi për gati 3.000 raste.

Por, aktiviste nga Rrjeti i Grave të Kosovës kanë thënë vazhdimisht për REL-in se, në fakt, numri i rasteve të dhunës në familje është më i lartë, por se shumë gra vazhdojnë të hezitojnë ta raportojnë dhunën që përjetojnë.

Këto punime ishin fotografuar gjatë një vizite të Radios Evropa e Lirë në Qendrën për Mbrojtjen e Gruas dhe Fëmijëve rreth dy vjet më parë. Megjithatë, punime të tilla vazhdojnë të krijohen vazhdimisht nga gratë e strehuara aty.

Ato mund edhe të personalizojnë punimet e tyre, ashtu që të reflektojnë historinë e tyre apo ta kujtojnë ndonjë të afërm.

Në mesin e punimeve të ekspozuara në këtë qendër shihet edhe lulja e llojit anemone, e ngjyrosur në të verdhë me prapavijë vjollce, që përfaqëson të mbijetuarat e dhunës seksuale gjatë luftës së fundit në Kosovë.

Përveç pëlhurave në formë rrethore, në këtë qendër gratë krijojnë edhe çanta të qëndisura.

Në këtë çantë janë ilustuar disa lule në qerpikët e një gruaje, në vend të lotëve.