BBC pezullon licencimin e përmbajtjes së tij në Rusi
Shtëpia mediatike britanike, BBC, njoftoi se do të ndalojë dhënien e licencave për përmbajtjen e saj në Rusi.
Kjo do të thotë se BBC nuk do t'u shesë asnjë program të ri transmetuesve rusë.
BBC po ashtu u ka dërguar një kërkesë zyrtare klientëve, që të ndalojnë transmetimin e disa episodeve të serialeve, për të cilat tashmë ka dhënë licencë.
Seritë që do të preken, përfshijnë versionin rus të spektakleve të kërcimit: "Strictly Come Dancing" dhe "Dancing with the Stars".
"Ne kemi vendosur t'i pezullojmë shitjet e reja për klientët rusë, sepse besojmë se nuk është e përshtatshme të bëjmë biznes me ta në këtë moment", tha BBC.
Edhe SHBA-ja pritet t’i ndalojë fluturimet ruse
Qeveria e SHBA-së pritet t’i ndalojë fluturimet ruse nga hapësira ajrore amerikane, nisur nga 2 marsi.
Agjencia Reuters thotë se lajmi i është konfirmuar nga zyrtarë të Qeverisë amerikane dhe të industrisë së aviacionit.
Bashkimi Evropian dhe Kanadaja kanë ndaluar tashmë fluturimet ruse mbi hapësirat e tyre ajrore, për shkak të pushtimit të Ukrainës nga Rusia.
Shtëpia e Bardhë, e cila nuk pranoi të komentojë të martën, ka zhvilluar bisedime të gjera me linjat ajrore amerikane për këtë çështje, raporton Reuters.
Rusia bllokon dy media të pavarura
Dy media të pavarura ruse - TV Rain dhe radio Ekho Moskvy - u ndërprenë të martën në mbrëmje.
Kjo pason një ankesë nga Zyra e prokurorit të përgjithshëm rus se dy mediat kanë transmetuar “thirrjet për aktivitete ekstremiste” dhe “informacione të rreme për ushtarakët rusë”.
TV Rain dhe Ekho Moskvy i mohuan akuzat.
Dy mediat mund të veprojnë në rrjetet sociale dhe në YouTube.
