Për shkak të nisjes së pushtimit të Ukrainës nga Rusia, disa shtete kanë vendosur kufizime në hapësirën ajrore për avionët rusë.
Mbi 90 protestues të arrestuar në Shën Petersburg
Më shumë se 90 njerëz u arrestuan në qytetin perëndimor të Rusisë, Shën Petersburg, derisa protestonin kundër luftës në Ukrainë.
Protesta u zhvillua në qendrën tregtare “Gostiny Dvor” në qendër të qytetit.
“Policia ruse arrestoi protestuesit dhe së paku një gazetar”, raporton BBC.
Një ditë më parë, policia në Shën Petersburg arrestoi rreth 900 protestues kundër luftës.
Apple ndalon shitjet në Rusi
Gjiganti amerikan i teknologjisë, Apple, ndaloi shitjet e produkteve të tij në Rusi.
Kompania tha se ka kufizuar edhe sistemin e pagesave, Apple Pay.
Media të ndryshme raportojnë se konsumatorët në Rusi, që bëjnë përpjekje të blejnë një telefon apo orë nga Apple në ueb-faqen e kompanisë, përballen me një mesazh që thotë se “dorëzimi i mallrave është i pamundur”.
Ky veprim nga Apple vjen pasi zëvendëskryeministri i Ukrainës, Mykhailo Fedorov, bëri të ditur këtë javë se i ka dërguar një letër kreut të kompanisë Apple, Tim Cook, për t’i kërkuar bllokimin e produkteve në Rusi.
BE përgatitet për miliona refugjatë nga Ukraina
Bashkimi Evropian po përgatitet për miliona refugjatë nga lufta në Ukrainë, tha të martën komisionarja e BE-së për Çështjet e Brendshme, Ylva Johansson.
Johansson tha se është vështirë të thuhet me saktësi se sa refugjatë do të kalojnë kufijtë e BE-së, pasi mbi 400,000 tashmë kanë kaluar.
Shumë prej tyre përballen me pritje të gjata në kalimet në Poloni, Hungari, Sllovaki dhe Rumani - shtete të BE-së që ndodhen në kufi me Ukrainën.
“Fatkeqësisht, ne duhet të përgatitemi për ardhjen e miliona njerëzve”, tha Johansson gjatë një vizite në kryeqytetin e Sllovakisë, Bratisllavë.
“Në të njëjtën kohë, kemi nevoja të mëdha dhe urgjente humanitare në Ukrainë, ku shumë njerëz janë zhvendosur brendapërbrenda”, shtoi ajo.
Johansson tha se shpreson se Këshilli Evropian do ta aktivizojë direktivën e përkohshme të mbrojtjes - nga e enjtja - për t’iu dhënë mbrojtje atyre që ikin.
Kjo do të ishte hera e parë për një gjë të tillë në BE.
